-
Nga:
Marigona Brahimi
- 8 shkurt 2023 13:57
- Shpërndaje në:
Kuvendi i Kosovës në seancën e së mërkurës ka miratuar vendimin për caktimin e taksave vjetore për vitin 2023 për Fondin e Kursimeve Pensionale.
Bazuar në rekomandimin e Komisionit për buxhet, taksa investuese për vitin 2023 do të jetë 0.32 për qind e mjeteve dhe taksa oepracionale prej 0.05 për qind e mjeteve.
Kërkesën e Fondit e ka paraqitur para deputetëve kryetari i Komisionit për buxhet, Armend Muja.
përputhje me Ligjin për fondet pensionale është bërë kërkesë dhe është trajtuar në Komisionin për buxhet, që konform ligjit dhe Kuvendi ta caktojë taksën vjetore investuese dhe operacionale ... Buxheti i miratuar nga Trusti pensional për aktivitetet operacionale për vitin 2023 është 1 milion 295 mijë euro, apo 31 mijë euro më pak se në vitin e kaluar, taksa operacionale për vitin 2023 është propozuar të jetë në normën 0,05 për qind e mjeteve një ulje kjo nga norma aktuale prej 0.57 për qind të mjeteve. Buxheti i miratuar për aktivitete investuese për vitin 2023 pritet të jetë në vlerë nominale prej 8 milionë e 227 mijë euro, apo 0.32 për qind e mjeteve”, ka theksuar Muja.
Në këtë seancë Kuvendi ka miratuar edhe rekomandimet lidhur me Raportin e auditimit për pasqyrat financiare të Shërbimit Spitalor Klinik dhe Universitar të Kosovës për vitin 2021, Raportin vjetor të Autoritetit Kosovar të Konkurrencës për vitin 2021 si dhe rekomandimet e dala nga shqyrtimi i Raportit të Auditimit për pasqyrat financiare vjetore të Telekomit të Kosovës për vitin 2021.
Ndërsa raportit vjetor i Bankës Qendrore të Republikës së Kosovës për vitin 2021, nuk ka kaluar. Gjithashtu nuk ka kaluar as Raporti vjetor i Këshillit të Pavarur Mbikëqyrës për Shërbimin Civil të Kosovës për vitin 2021.
Ndërsa si pasojë e mospjesëmarrjes në votim të 72 deputetëve të pranishëm, nuk ka arritur që të votohet në parim i Projektligji për plotësimin dhe ndryshimin e Ligjit për Këshillin e Pavarur Mbikëqyrës për Shërbimin Civil të Kosovës. Në votim kanë marr pjesë vetëm 59 deputetë. Kjo pikë është bartur për seancën tjetër.
Pas kësaj Kuvendi ka shkuar në pauzë deri në orën 16:00.
Seanca e së mërkurës ka nisur me një minutë heshtje në nderim të viktimave të tërmetit që ka goditur Turqinë e Sirinë, të hënën.
