Abazoviq takohet me Osmanin: Mali i Zi po promovon bashkëpunimin dhe pajtimin në rajon
Kryeministri i Malit të Zi, Dritan Abazoviq, ka thënë se shteti që udhëheq po synon promovimin e bashkëpunimit dhe pajtimit në rajon gjatë një takimi me presidenten e Kosovës, Vjosa Osmani, në Podgoricë të martën.
Në një postim në Facebook, Abazoviq ka shkruar se fokusi i tyre mbetet në zhvillimin ekonomik dhe projektet infrastrukturore që do ta lidhni edhe më mirë rajonin e Ballkanit.
“Mali i Zi po promovon bashkëpunimin dhe pajtimin në rajon. Ne vazhdojmë të udhëheqim politikën e fqinjësisë së mirë dhe të mbajmë fokusin tonë në zhvillimin ekonomik dhe projektet infrastrukturore që do të na lidhin edhe më mirë. Sot ishim shumë të kënaqur të presim Vjosa Osmanin, presidenten e Republikës së Kosovës, e cila ndodhet për një vizitë zyrtare në vendin tonë”, ka shkruar Abazoviq.
Në takim me Abazoviqin, Osmani vlerësoi lart fqinjësinë me Malin e Zi, për të cilën kontribuojnë komuniteti shqiptar në këtë shtet dhe ai malazez në Kosovë.
"Presidentja Osmani tha se për Kosovën, Mali i Zi është një partner, te i cili ka gjetur mbështetje në vazhdimësi dhe shfaqi shpresën se kjo mbështetje do të vazhdojë edhe më tej. Në këtë frymë, Presidentja Osmani tha se forcimi i vazhdueshëm i Kosovës në arenën ndërkombëtare ka nevojë për mbështetjen e shteteve mike si Mali i Zi", thuhet në njoftimin e Presidencës.
Osmani më herët u takua edhe me presidentin malazias Milo Gjukanoviq, të cilët mbajtën edhe një konferencë për media.
