Arbëri

Palokaj për propozimin evropian: S’është ambicioz, nuk përfshin marrëveshje gjithëpërfshirëse

Korrespodenti i KOHËS në Bruksel, Augustin Palokaj, e ka quajtur propozimin evropian, të njohur në publik si franko-gjerman, si një propozim jo shumë ambicioz.

Palokaj në një bisedë për “Interaktiv” në KTV ka thënë se bashkësia ndërkombëtare ka zbehur ambiciet, duke kaluar nga një insistim për një marrëveshje gjithëpërfshirëse ligjërisht obliguese mes Kosovës e Serbisë, te një marrëveshje bazë.

“Ky propozim nuk është aq ambicioz. Është heqje dorë e BE-së dhe Amerikës nga kërkesa për marrëveshje gjithëpërfshirëse ligjërisht obliguese”, ka thënë Palokaj. “Është marrëveshje bazë, nuk është gjithëpërfshirëse. Ka pikat themelore, në formë të një koncepti politik, e do të ketë diskutime të shumta pasi të nënshkruhet, për vite ndoshta, për të zbatuar marrëveshjen. Kryeministri Kurti thotë se është bazë e mirë. Marrëveshje vetë e ka emërtimin bazë. Mendoj se propozimi nuk përfshin njohje të ndersjellë, e as zgjidhje finale të çështjes së raporteve Kosovë – Serbi. E ka pranuar edhe vetë emisari Lajçak këtë. Në pamundësi të detyrohen palët për një marrëveshje gjithëpërfshirëse ligjërisht obliguese, është propozuar marrëveshje bazë për normalizim, e që hap rrugën në të ardhmen të ketë marrëveshje finale gjithëpërfshirëse”.

Palokaj ka thënë se nga diskutimi i emisarit Miroslav Lajçak me kryeministrin e Kosovës, Albin Kurti dhe presidentin e Serbisë, Aleksandar Vuçiq, nuk kanë dalë shumë porosi.

“Në bazë të bisedimeve të Lajçakut në Prishtinë e Beograd ndoshta po lëvizim drejt një takimi të radhës të nivelit të lartë mes Kurtit e Vuçiqit, ku mund të ketë lëvizje përpara drejt miratimit të propozimit të marrëveshjes bazë apo siç njihet në opinion propozimi franko-gjerman”, ka thënë Palokaj.

Palokaj ka thënë se sa i përket 5 shteteve të BE-së që nuk e njohin Kosovën, ato të gjitha kanë qëndrime të ndryshme.

“Greqia e Sllovakia kanë qëndrim më flesibil, Spanja e Qipro më të ashpër, ndërsa Rumania aty në mes është”, ka thënë Palokaj.


Palokaj: S’besoj që Lajçaku e Borrelli do kërkojnë njohjen e Kosovës nga 5 vendet mosnjohëse

Korrespodenti i KOHËS në Bruksel, Augustin Palokaj, ka deklaruar se nuk beson që shefi i diplomacisë së Bashkimit Evropian (BE), Josep Borrell dhe përfaqësuesi special të BE-së për dialogun Kosovë – Serbi, Miroslav Lajçak, do të kërkojnë nga 5 vendet mosnjohëse që ta njohin Kosovën si shtet.

Palokaj të hënën në “Interaktiv” të KTV-së, ka thënë se ata vinë nga vende që kanë dërguar argumente kundër shtetit të Kosovës.

“Nuk besoj që Lajçaku e ka kërkuar nga këto vende njohjen e Kosovës, fundi i fundit Lajçak dhe shefi i tij kanë qenë ministra të jashtëm të vendeve që kanë refuzuar ta njohin Kosovën dhe kanë dërguar argumente kundër njohje së Pavarësisë së Kosovës, që i kanë ngjarë më shumë qëndrimeve të Rusisë sesa shumicës së vendeve të BE-së. Nga ky ekip ku janë Borrelli dhe Lajçaku nuk pres që të shkojnë aq larg sa të kërkojnë njohjen e Kosovës nga këto 5 vende”, ka deklaruar Palkokaj.

Ai ka theksuar se pret që ata të përpiqen që këto vende të mos e pengojnë avancimin e Kosovës në procesin e integrimeve evropiane. Palokaj ka deklaruar se marrëveshja për themelimin e Asociacionit ka qenë e gabuar, por ka thënë se nuk sheh ndonjë mundësi se si Kosova do të mund të kalojë pa e zbatuar atë e pa pasur pasoja nga bashkësia ndërkombëtare.