Arbëri

Nushi: Uji i ambalazhuar s’ka shanse të dalë në treg pa i plotësuar standardet

Burbuqe Nushi nga Instituti Kombëtar i Shëndetit Publik të Kosovës (IKSHPK), ka thënë se nuk ka asnjë mundësi që të dalë në treg ujë i ambalazhuar, i cili nuk i plotëson standardet e parapara.

Nushi ka thënë të premten në “Sot” të KTV-së se IKSHPK-ja i monitoron edhe kompanitë që prodhojnë ujë të pijshëm, ndonëse jo të gjitha, dhe se uji i tyre është brenda standardeve.

“Ne si Institut jemi monitorues të ujit të pijshëm, askund nuk shkruan se a është ujë i pusit, i kompanisë, apo i ujësjellësit. Edhe ato monitorohen te ne dhe po u garantoj se shanse nuk ka, nuk lejohet të dalë në treg një ujë që sado pak nuk i plotëson standardet e parapara. Edhe uji i ambalazhuar është brenda standardeve edhe pse ka disa kompani që nuk monitorohen por i kanë laboratorët e veta”, është shprehur ajo.

Nushi ka folur edhe rreth rekomandimeve të vazhdueshme të IKSHPK-së për vlimin e ujit, si pasojë e vërshimeve që ndodhën në disa qytete të Kosovës në janar, duke thënë se vlimi është një masë e garancisë.

“Instituti rekomandon vlimin si masë e garancisë për ndotjen bakterore në situata siç kemi qenë deri tash. Kjo nuk do të thotë se uji ka ndotje, absolutisht jo. Aty ku ka ujë në rubinetë, uji është i sigurt, problemi edhe për qytetarët dhe këndvështrimi i shëndetit publik, na shqetëson fakti i reduktimeve. Vlimi i ujit është siguri e shtuar. Kumtesa gjithmonë ka qenë kujdes të shtuar. Problematika na vjen prej zonave rurale sa i përket sëmundjeve me ujin. Shumica e bunarëve në Kosovë janë të cekët, të pambrojtur, të pamenaxhuar, jo të ndërtuar sipas standardeve dhe mundësia e kontaminimit të ujit është shumë e madhe”, ka shtuar Nushi.