Ministrja e Arsimit, Shkencës, Teknologjisë dhe Inovacionit, Arbërie Nagavci, deklaroi se llogaridhënia e mësimdhënësve do të jetë mekanizmi për të garantuar rritjen e pagave, që u bë me koeficientin e ri.
Ajo shkroi në Facebook se Ministria synon t’i nxisë mësimdhënësit për përformancë më të mirë, derisa tha se Ligji për Paga është fitore për të gjithë, por për në arsim, vëmendja është te cilësia.
“Paga bazë është vetëm fillimi. Ligji promovon shtesat për mësimdhënës në bazë të performancës/licencimit. Ky është synimi jonë, nxitje të vazhdueshme monetare dhe jo monetare për performancë më të mirë të mësimdhënësve tanë. Rritja në paga duhet të jetë shpërblyese për mësimdhënësit e mirë dhe nxitje për mësimdhënie cilësore. Llogaridhënia do të jetë mekanizmi ynë që do të na garantojë se kjo pagë kthehet në përfitim për nxënësit tanë”, shkroi Nagavci.
Sipas ministres së Arsimit, rritja e pagës dëshmon përkushtimin e MASHTI-t ndaj mësimdhënësve dhe përmirësimin e cilësisë në arsim.
“Ligji për paga është fitore për të gjithë, por në arsim vëmendjen e kemi tek cilësia. Dhe, për këtë besoj shumë në vullnetin dhe përkushtimin e të gjithë mësimdhënësve për të ofruar mësimdhënie cilësore. Jemi së bashku në rrugëtimin tonë për një arsim më të mirë”, tha ajo.
Nga Sindikata e Bashkuar e Arsimit, Shkencës dhe e Kulturës (SBASHK), u shprehën të pakënaqur me koeficientët, mirëpo deklaruan se nuk do ta dërgojnë në Gjykatën Kushtetuese.
© KOHA. Të gjitha të drejtat janë të rezervuara.
