Koeficienti vlerësohet i pamjaftueshëm, në SBASHK thonë se nuk do ta atakojnë në Kushtetuese
Pakënaqësi ndaj vlerës se koeficientit shprehën Sindikatat e Shërbyesve Civilë, infermierëve, policëve e zjarrfikësve. Në SBASHK thanë se, me gjithë që koeficienti nuk i përmbush pritjet e mësimdhënësve, nuk do ta dërgojnë Ligjin për Paga në Gjykatë Kushtetuese. Por atakimin e tij në instancën më të lartë gjyqësore e paralajmëruan në Këshillin Prokurorial
E pamjaftueshme për përmbushjen e pritjeve të mësimdhënësve është vlerësuar vlera e koeficientit prej 105 eurosh për pagat e sektorit publik.
Në Sindikatën e Bashkuar të Arsimit shprehën pakënaqësi porse bënë të ditur që nuk do ta dërgojnë atë në Gjykatën Kushtetuese.
“Ky rangim ka bërë që vlera e koeficientit prej 105 eurosh të mos i plotësojë pritjet tona, por ajo mundëson që mbi 90 për qind e anëtarësisë tonë të kenë një rritje page mesatare rreth 100 euro”, thuhet në reagimin e Sindikatës së Bashkuar të Arsimit, Shkencës dhe Kulturës.
Edhe drejtori i shkollës “Emin Duraku” në Prishtinë, Visar Osmani, tha se vlera e koeficientit është cilësuar si e ultë nga stafi i tij.
“Është një rritje simbolike, normal që limitet buxhetore e detektojnë se si qysh. Vërehet që ka pakënaqësi prej mësimdhënësve, megjithatë uroj që kjo të mos jetë e stagnuar po të jetë rritje permanente...”, ka thënë Osmani.
Bazuar në koeficientin e ri, paga bazë e një mësimdhënësi të nivelin fillor arrin në 588 euro, nga 421 euro. Për ata të nivelit të mesëm, nga 459 euro do të rritet në 609 euro. E pagat e profesorëve universitarë do të zvogëlohet për afër 100 euro.
Krahas asaj të Arsimit, reagime mbi koeficientin pati edhe në sindikata të tjera.
Ali Sefaj, përfaqësues i Sindikatës së Shërbyesve Civilë, e paralajmëroi atakimin e Ligjit për Paga në Gjykatën Kushtetuese.
“Si administratë publike jemi të pakënaqur. Dhe Ligjin për Paga nëpërmjet Avokatit të Popullit do ta dërgojmë në Gjykatën Kushtetuese, pasi me të mund të bie edhe vlera e koeficientit”, ka thënë ai për KOHËN.
E dërgimin e Ligjit në Kushtetuese e paralajmëruan edhe në Këshillin Prokurorial, shkaku i uljes së theksueshme të pagave për punonjësit e sistemit të drejtësisë.
Koeficienti nxiti pakënaqësi edhe në sindikata të infermierëve, të policisë, edhe të zjarrfikësve.
Imer Zeqiri, kryetar i Sindikatës së Policisë, tha se rritja në pagat e policëve nuk e reflekton rrezikshmërinë e tyre në punë. E ai i zjarrfikësve e quajti zhgënjyese pagën bazë prej 525 eurosh për punonjësit e sektorit.
“Është zhgënjyese duke pasur parasysh edhe koston e jetës dhe inflacionin dhe vështirësive për t’ia dalë”, ka thënë ai.
E në Sindikatën e Sektorit Privat, nëpërmjet një letre dërguar kryeministrit dhe ministrit të Financave, kërkuan që punëtorët teknikë dhe të sigurimit fizik, të angazhuar në institucione publike, të paguhen në bazë të koeficientit të ri.
