Të mbijetuarit e masakrës në Rugovë tregojnë tmerrin, kërkojnë që kryesit të vihen para drejtësisë
Me nderime e homazhe janë përkujtuar 30 të rënët në 24-vjetorin e masakrës në Rogovë të Hasit. Të mbijetuarit dhe familjarët e viktimave kanë rikthyer në kujtesë momentin kur forcat paramilitare serbe kanë vrarë e masakruar luftëtarët e Ushtrisë Çlirimtare të Kosovës dhe civilët e fshatit. Ata kanë kërkuar nga institucionet që kryesit të vihen para drejtësisë.
Para 24 vjet oborri i familjes Berisha në Rogovë të Gjakovës ishte i mbushur me gjak e kufoma të ushtarëve të Ushtrisë Çlirimtare të Kosovës e të civilëve.
Momentin kur forcat paramilitare serbe masakruan shqiptarët e ka të freskët vëllai i dëshmorit Xhevdet Berisha.
Ai ka rrëfyer për televizionin momentin kur kanë rënë në pritë ushtarët e UÇK-së, e pastaj kur forcat serbe masakruan edhe nëntë banorë të fshatit, të cilët tentuan t’i strehonin luftëtarët të cilët ishin plagosur.
"Me plumba fillimisht i kanë vra dhe pastaj i kanë ther me thika, që të gjithë. Shihen edhe kufomat, vëllai jem është ther me thikë, është i vrarë dhe therur me thikë... Ata i kanë vrarë këtu të gjithë, kanë marrë edhe fqinjët, i kanë bërë bashkë të gjithë këtu dhe i kanë vrarë në një vend... Deri në ora 3 kam qëndruar, këta familjet i kanë marrë e i kanë bërë krejt bashkë me një dhomë këtu, kam menduar se do t'i mbysin dhe do t'i kallin për të humbur gjurmën”, ka thënë Berisha.
Motra e tij, e cila erdhi për homazhe për herë të parë nga diaspora, nuk arrinte t’i përmbante lotët.
“Më janë vra vëllai dhe fqinjët, të gjithë, unë qe 25 vjet nuk kam qenë këtu t’i shoh vëllanë dhe fqinjët... ka lënë dy djem dhe dy çika, gruan, njëri djalë është në kurbet, nuk ka mundur të vijë as ai...", ka thënë motra e tij.
Fatmire Berisha, e mbijetuara e masakrës, tregon momentin kur forcat serbe ia morën vajzën tremuajshe për t’ia hedhur nga dritarja.
“Ata gjuanin sa kanë mundur, vajzën time trejavëshe në djep e kanë kap me gjithë djep e për dritare me hedh, e nana ime iu tha ‘mos se është fëmijë’ dhe e lanë. Serbët nuk ndalonin duke thënë ‘veç t’i vrasim të gjithë këtu se është ushtria’, e njëri tha ‘mos bre, se ishim të gjithë gra e fëmijë, se burrat ishin në pazar’. Kemi mbetur me atë trishtim e sa herë vjen kjo ditë më duket që ka ndodhur sot”, ka thënë e mbijetuara e masakrës në Rogovë, Fatmire Berisha.
Në oborrin e familjes Berisha ia vranë burrin dhe tre djemtë e saj Zarife Morinës. Më i vogli ishte 17 vjet. Ajo kërkon nga institucionet që kryesit të vihen para drejtësisë.
“Lajmi ka qenë i papërballueshëm, dhimbja ka qenë e madhe, katër meshkuj me dalë jashtë dhe mos me u kthye asnjëherë në shtëpi është shumë rëndë për mua dhe për të gjithë familjen, pasi kam qenë me djalë dy vjet”, ka thënë Zarife Morina, familjare e viktimave të masakrës së Rogovës.
Në datat 27, 28 dhe 29 janar të vitit 1999 në fshatrat Bishtazhin, Goden dhe Rogovë u vranë 30 shqiptarë. Për t’i përkujtuar ata gjatë ditës bënë homazhe qytetarë të shumtë e përfaqësues politikë.
Kryeministri Albin Kurti vendosi lule në varrezat e të rënëve, e kryetari i Aleancës për Ardhmërinë e Kosovës, Ramush Haradinaj, e kualifikoi si njërën prej ngjarjeve më të dhimbshme, e njëkohësisht edhe njëra prej momenteve më të lavdishme të luftës së Ushtrisë Çlirimtare.
