Përfaqësuesi kroat: Kosova është gati për KiE dhe ne jemi gati për Kosovën

Përfaqësuesi i Kroacisë, Domagoj Hajdukoviq, në Asamblenë e Këshillit të Evropës ka bërë thirrje që Kosova të pranohet si pjesë e familjes evropiane. Ky, ka thënë ai, është hapi drejt një paqeje.

Ai ka theksuar se Kosova është gati për anëtarësim në strukturat evropiane.

“Nxit kolegët që ta mbështesin aplikimin e Kosovës për Këshillin e Evropës, i bëj thirrje Këshillit të Ministrave që ta vënë këtë vendim në asamblenë tonë kështu që të vazhdojmë me pranimin e Kosovës. Mendoj se të gjithë, jo vetëm kosovarët, por të gjithë do të përfitojnë nga një anëtar i ri. Mendoj se Kosova është gati dhe ne jemi gati për Kosovën”, ka thënë ai.

Hajdukoviq është shprehur skeptik për qëndrimin e Serbisë drejt normalizimit të marrëdhënieve, duke u mbështetur, siç tha ai, në përvojat e kaluara me Beogradin.

“Në ditët e fundit kemi parë sinjale premtuese nga Beogradi megjithatë duke gjykuar nga eksperienca e kaluara më lejoni të shprehem skeptik. Nëse tregohem optimist dhe shpresoj se përgjegjësia nuk do kalohet nga njëra anë te tjetra, por të dyja palët duhet të njohin se përgjegjësia për mbajtjen e paqes është e të dyjave. Dhe në të gjitha gjykimet, duhet të them se përgjegjësia po anon rëndë nga ana e Beogradit në këtë rast. Në çdo rast, eskalimi nuk është në interesin e askujt, do të lëndojë Kosovën, Serbinë, rajonin, kontinentin dhe nëse vazhdojmë në rrugën e destabilizimit do të jemi në rrugë drejt askundit”.

Saranda Bogujevci ka folur para përfaqësuesve të shteteve në Asamblenë e Këshillit të Evropës. Ajo ka thënë se Kosova është e përkushtuar ndaj sundimit të ligjit, të drejtave të njeriut, lirinë e medias dhe respektit e lirisë ndaj komuniteteve në Kosovë.

Deputetja e Kuvendit të Kosovës ka thënë se strukturat kriminale po inkurajohen direkt nga presidenti serb për veprime në veri të vendit.

Ndërsa ka përmendur krimet e kryera nga serbët gjatë luftës në Kosovë, ka theksuar se Serbia asnjëherë deri sot nuk e ka distancuar veten nga krimet gjenocidale të Millosheviqit.

Ajo ka përmendur edhe grupin Wagner duke thënë se anëtarë të tij po hyjnë në Kosovë përmes Serbisë.

“Kosova si shtet po përballet me veprime ilegale të strukturave kriminale në veri të vendit të cilat po inkurajohen nga presidenti Vuçiq direkt. Serbia asnjëherë nuk e ka distancuar veten nga krimet gjenocidale të Millosheviqit kundër shqiptarëve të Kosovës dhe minoriteve gjatë vitit 1998-99. Vazhdon të koordinojë politika me Rusinë e të armatoset nga Rusia. Serbia jo vetëm që nuk ndëshkoi dhe vendosi sanksione kundër Rusisë, por është shumë shqetësuese të shihen anëtarë të Wagnerit që janë dukur në veri të Kosovës duke hyrë nga Serbia”.

Bogujevci ka shtuar se Serbia vazhdimisht po kërkon pretekste për ta destabilizuar veriun e Kosovës.

“Është e qartë se Serbia po kërkon vazhdimisht për pretekste për ta destabilizuar veriun e Kosovës. Po e bëjnë këtë sepse po përpiqen ta heqin veten nga dialogu politik me Kosovën, nga normalizimi i plotë i marrëdhënieve përmes marrëveshjes finale me njohje reciproke. Duke respektuar ligjin dhe duke luftuar krimin e organizuar nuk duhet të ketë alternativë dhe nuk është i adresuar në baza etnike, por në baza të veprimit të dikujt”, ka deklaruar Bogujevci.

Deputeti i Ukrainës në Asamblenë e Këshillit të Evropës. Oleksii Goncharenko, u është drejtuar ashpër përfaqësuesve serbë në këtë institucion.

Ai ka thënë se Serbia duhet të ndalojë karshi Kosovës dhe ta pranojë realitetin e shtetit të pavarur, se nuk mund të kthejnë diçka që ajo mendon se e ka humbur.

Goncharenko ka theksuar se nuk është në interesin e mirë të Serbisë që të vazhdojë me veprimet kundër Kosovës.

“Dua tu adresohem serbëve dhe Serbisë dhe t'u them se nuk është në interesin më të mirë të Serbisë që ta bëjë këtë. Ata duhet të ndalojnë. Shikoni historinë, Gjermania pas Luftës së Parë Botërore e përçarë pranoi katastrofën e Luftës së Dytë Botërore, pas saj Gjermania pranoi realitetin, paqen në Evropë dhe u bë shtet i mrekullueshëm. Serbia duhet ta bëjë të njëjtën gjë, që ta ndërtojë një shtet normal, që të futet në BE, të mos tentojë të marrë mbrapsht diçka që ata mendojnë se e kanë humbur, edhe nëse mendojnë se e kanë humbur, e kanë humbur përgjithmonë. Është koha ta pranojnë këtë dhe ta vazhdojnë tutje. Le të themi se Kosova është Evropë, se i pranojmë në KiE dhe Serbia të lëvizë në të njëjtën drejtim”, ka thënë ai.

Goncharenko ka shtuar tutje se Evropa duhet të jetë e bashkuar për të ecur përpara për të siguruar stabilitet dhe paqe.

Ndërsa, ka bërë thirrje te shtetet mosnjohëse që ta njohin Kosovën.

“Dua t’i adresohem shteteve që nuk e kanë njohur Kosovën shtet, ta bëjnë këtë. Ukraina, shteti im është një nga to. Kam sponsorizuar projektligjin në Parlamentin ukrainas që ta njohë pavarësinë e Kosovës dhe jam i sigurt se do të ndodhë shumë shpejt, sepse ky është realiteti. Duhet t’i emërojmë gjërat ashtu siç janë, ky është shtet i pavarur, tashmë ka ndodhur. Në interesin e të gjithëve në këtë kontinent veç pranoni realitetin dhe vazhdoni përpara”, ka thënë ai.

Përfaqësuesja serbe thotë se kompromisi me Kosovën është mënyra e vetme për stabilitet në Ballkanin Perëndimor Ndërkohë përfaqësuesja serbe, Dubravka Filipovski, pas akuzave që ka drejtuar ndaj Kosovës për kinse gjendjen e vështirë për mbijetesë të serbëve në veri të Republikës, ka thënë se Beogradi është i përkushtuar në kompromis. “Pavarësisht problemeve në terren, Beogradi qëndron i përkushtuar në dialog konstruktiv dhe kompromisi është e vetmja formë për të krijuar stabilitet të përhershëm në Kosovë dhe Ballkanin Perëndimor”.

Përfaqësuesja e Maqedonisë së Veriut kërkon pranimin e Kosovës në Këshillin e Evropës

Deputetja nga Maqedonia e Veriut, Arta Bilalli Zendeli, në Asamblenë e Këshillit të Evropës tha se askush nuk mund të zhbëjë pavarësinë e Kosovës duke shtuar se nuk ka alternativë tjetër përveç marrëveshjes me njohje reciproke në mes të Kosovës dhe Serbisë. Ajo tha se Këshilli i Evropës duhet ta pranojë Kosovën si anëtare të plotë sa më shpejtë që është e mundur.

Zendeli tha se Ballkanit Perëndimor i duhet paqe, stabilitet dhe integrim derisa theksoi që Serbia duhet t’i kthehet dialogut për njohjen reciproke në qendër.

“Ballkanit Perëndimor i duhet paqja e qëndrueshme, stabiliteti, siguri, integrim, dhe autoritetet serbe duhet t'i kthehen dialogut për normalizimin e marrëdhënieve me njohje reciproke në qendrën të saj, dhe t'i zgjidhë të gjitha çështjet në mënyrë paqësore. Sovraniteti dhe pavarësia e Kosovës janë të njohura ndërkombëtarisht dhe askush nuk mund ta zhbëjë atë, ngase ato janë realitet. Ata po respektohen nga bota demokratike dhe Kosova po qëndron me demokracinë dhe demokracitë në një kohë kur lufta është kthyer në Evropë. Të nderuar anëtarë, të nderuar kolegë, fotografitë nga historia e re, si masakra e Reçakut, si masakra e Mejës, e kështu me radhë, që ndodhë në Kosovë, nuk na lejon të qëndrojmë neutral në këto tensione. Për këtë arsye, vetëm dialogu dhe integrimi mund të jenë një mjet për zgjidhjen e problemeve, dhe Këshilli i Evropës mund të çojë në këtë proces duke pranuar Kosovën si anëtare të plotë të Këshillit të Evropës sa më shpejt të jetë e mundur”, tha ajo.

Ajo shtoi se Maqedonia e Veriu mbështet fuqishëm dialogun mes Kosovës dhe Serbisë duke shtuar se ekziston një momentum siç është ai me propozimin e ri franko-gjerman që sipas saj do të sillte paqe të qëndrueshme për palët por edhe gjithë rajonin.

“Status quo nuk duhet të vazhdoj sepse nuk i ndihmon rajonit, por ndihmon forcat e treta që janë të interesuara dhe të fokusuara në rajonin e Ballkanit Perëndimor. I inkurajojmë palët, Kosovën dhe Serbinë që të arrijnë një marrëveshje me njohje reciproke duke vazhduar dialogun, si zgjidhje e vetme dhe mjet për rajon stabil dhe të sigurt. Nuk ka alternativë përveç njohjes reciproke dhe integrimit në Bashkimin Evropian. Një momentum mjaft specifik që duhet përmendur është se tensionet po ndodhin në një kohë shumë specifike, në një kohë kur një propozim francez gjerman, siç është një propozim i ri dhe si zgjidhje për problemin që do të sillte paqe të qëndrueshme, si për palët, ashtu edhe për rajonin”, shtoi ajo.

Përfaqësuesi i Shqipërisë në Asamblenë e Përgjithshme të Këshillit të Evropës, Lulzim Basha, ka bërë thirrje që shtetet që nuk e kanë njohur ende Kosovën, ta bëjnë këtë.

Në fjalën e tij gjatë diskutimit që po mbahet mbi Kosovën, ai ka thënë se sa më parë që të pranohet nga të gjitha shtetet realiteti se Kosova është shtet i pavarur, do të jetë më mirë për qytetarët e Kosovës dhe për të ardhmen e rajonit.

Duke iu referuar situatës së fundit në veri të Kosovës, Basha ka thënë se retorika nacionaliste ka treguar se në Serbi ende e gjejnë të vështirë të shkëputen nga e kaluara e përgjakshme.

“Fatkeqësisht si ngjarjet e fundit treguan edhe sot disa mendojnë se retorika nacionaliste do t’i ndihmojë të mbajnë fuqi të përjetshme, të tjerë e gjejnë të vështirë të shkëputen nga e kaluara e përgjakshme. Sidoqoftë, këto dilema nuk mund të mbajnë të ardhmen e rajonit peng, nuk duhet ta mbajnë të ardhmen evropiane të Serbisë peng. Nëse përfaqësuesit e Serbisë këtu sot janë të shqetësuar për të drejtat e minoritetit serb në Kosovë, atëherë le t’i bashkojmë përpjekjet bashkë dhe të mirëpresim Kosovën si anëtare të Këshillit të Evropës, duke lejuar mbrojtjen e të drejtave të njeriut dhe minoriteteve që ky institucion ofron për të gjithë”, ka thënë Basha.

Basha ka thënë se pas agresionit rus në Ukrainë, është koha që të mendohet më mirë dhe të vihet paqja e stabiliteti në Evropë, duke filluar nga pranimi i Kosovës shtet.

“I bëj thirrje shteteve anëtare të BE-së që nuk e kanë njohur ende Kosovën, 15 vjet pas pavarësisë dhe 1 vit pas agresionit të Rusisë në Ukrainë, është koha që të vëmë paqen dhe stabilitetin, paqen dhe stabilitetin tona, paqen dhe stabilitetin e Evropës fillimisht. Kosova është rast sui generis dhe do të ishte gabim i madh për secilin shtet që të ngrehë paralele me situatat e tjera. Çfarë po ndodh në Ukrainë sot, na flet ne që të shohim përtej interesave të sotme. Ballkani Perëndimor në NATO, Ballkan Perëndimor në BE nënkupton Evropë më të fortë, stabile dhe me prosperitet”, ka deklaruar Basha.

​Bushka në KiE: Kosova është treguar konstruktive për normalizimin e marrëdhënieve me Serbinë

Deputetja e Shqipërisë në Asamblenë e Këshillit të Evropës, Klotilda Bushka tha se Kosova asnjëherë nuk ka nxitur tensione por ka treguar konstruktivet në synimin për normalizimin e marrëdhënieve me Serbinë.

Ajo tha se duke e mbajtur Kosovën jashtë Këshillit të Evropës, rritën mundësitë që grupe si Wanger të rrezikojnë stabilitetin e rajonit.

“Nuk mund të shqetësohemi për tensionet atje nga njëra anë dhe të mbajmë në sirtar për më shumë se tetë muaj një kërkesë të thjeshtë të paraqitur nga Kosova në këtë shtëpi. A janë kosovarët të kualifikuar për t'i merituar shërbimet e kësaj organizate apo jo. A mund t'u japim atyre një përgjigje? Dhe ky është shqetësimi kryesor sepse sa më gjatë të mbahet Kosova në derë dhe të mos lejohet të hyjë në strukturën tonë demokratike aq më të mëdha janë mundësitë që akterët e tretë të të ashtuquajturave grupe Wagner të rrezikojnë stabilitetin e rajonit tonë”, tha ajo.

Në KiE ku është diskutuar për tensionet e fundit në mes të Kosovës dhe Serbisë ajo tha se Shqipëria është e interesuar për paqe dhe stabilitet duke shtuar se janë shqetësuar për rritjen e tensioneve.

“Pse Kosova ka dashur ndonjëherë të nxisë tensionet, kur për shembull po tregon se sa favorizuese është ndaj politikës së jashtme dhe të sigurisë të BE-së, se si ka bërë në mënyrën më të fortë të mundshme dënimin e agresionit rus kundër Ukrainës dhe përafrimin e shpejtë me sanksionet e vendosura nga bota demokratike kundër Rusinë. Sa konstruktive ka qenë Kosova në synimin e saj për normalizimin e marrëdhënieve me Serbinë duke marrë masa konform marrëveshjes së Brukselit dhe duke treguar gatishmëri për kompromis, duke përfshirë identifikimin e automjeteve, targat, dhe shtyrjen e zgjedhjeve, ndërsa pala tjetër po bën të kundërtën për të rrezikuar progresin e arritur. Të nderuar kolegë, më lejoni të kujtoj këtu se është një paradoks të argumentosh dhe gjykosh një vend sovran që kërkon kaq pak gjëra të thjeshta, në mënyrë që qytetarët e tyre të mos zhgënjehen dhe të ndalen në kufij sikur të ishin duke ardhur nga hëna dhe jo nga qendra e kontinentit tonë.

© KOHA. Të gjitha të drejtat janë të rezervuara.