Kurti: Të mësohemi me parehatinë, s’dihet çfarë na sjell e ardhmja

Kryeministri i Kosovës, Albin Kurti, është deklaruar rreth thirrjes së tij për më shumë ushtarë të NATO-s në Kosovë, në kuadër të diskutimit të organizuar nga Akademia Diplomatike e Vjenës, Instituti Austriak për Politika Evropiane dhe të Sigurisë, si dhe nga Ambasada e Kosovës në Austri.

Kurti ka thënë se Kosova duhet të mësohet me parehatinë, meqë nuk dihet se çfarë mund të sjellë e ardhmja.

Kështu u shpreh ai derisa foli për mundësinë që Serbia të nisë sulm, për çka tha se do të ishte e papërgjegjshme nëse kjo nuk konsiderohet se mund të ndodhë.

“Përderisa bëj thirrje për më shumë ushtarë të NATO-s në Kosovë, po i forcojmë edhe kapacitetet tona. Rreth kufirit të vendit tonë në Serbi janë 48 baza operacionale përpara, nuk them se do të na sulmojnë javën apo muajin e ardhshëm, por do të ishte e papërgjegjshme të mos i konsiderojmë të gjitha bashkë. Pra, mendoj se prania më e madhe e NATO-s është më mirë për ne. Nuk është vetëm Serbia, është edhe ndikimi i Rusisë në Serbi. Ne duhet të mësojmë të ndihemi rehat me parehati sepse nuk e dimë kurrë se çfarë na sjell e ardhmja”, ka thënë Kurti.

Ai shtoi se Kosova nuk ka dhe nuk dëshiron të ketë alternativë tjetër përveç BE-së dhe NATO-s, megjithatë shprehi pakënaqësitë e tij.

“Ndonjëherë jam i pakënaqur, por pakënaqësia ime duhet të kthehet në kritik, jo në hidhërim apo cinizëm dhe mendoj se ky është kontributi i Kosovës për rajonin dhe për BE-në në çështjet aktuale”, ka thënë ai.

Ai përmendi edhe termet demokratizim dhe evropianizim të Ballkanit Perëndimor, për të cilat tha se janë parakusht për stabilitetin afatgjatë dhe paqen e qëndrueshme.

“Demokratizimi dhe evropianizimi i Ballkanit Perëndimor është parakusht për stabilitetin afatgjatë dhe paqen e qëndrueshme ku do të mund të jetonim si fqinj dhe të kemi marrëdhënie të mira bashkëpunim normal. Me demokratizim nënkuptoj sundimin e së drejtës, pluralizmin politik, të drejtat e njeriut dhe pastaj edhe të drejtat e pakicave. Me evropianizim nënkuptoj zgjerimin e BE-së, ku i gjithë Ballkani Perëndimor do të bëhej pjesë e tij dhe në këtë mënyrë BE-ja do të bëhej Evropë”, u shpreh ai.

Kryeministri i Kosovës, Albin Kurti, ka thënë se Serbia po i kërcënon fqinjët e saj duke i përdorur pakicat etnike për destabilizim, në vend se të kërkojë falje për luftërat që i ka zhvilluar vjet më parë.

Në kuadër të diskutimit të organizuar nga Akademia Diplomatike e Vjenës, Instituti Austriak për Politika Evropiane dhe të Sigurisë, si dhe nga Ambasada e Kosovës në Austri, Kurti ka thënë se paqja kuptimplote e qëndrueshme në Ballkan është e pamundur derisa Serbia nuk e pranon fajin e saj.

“Derisa lidershipi në Serbi nuk pranon të kërkojë falje apo të pranojë fajin e vet, paqja kuptimplotë e qëndrueshme në Ballkan është e pamundur. Në vend se të kërkojë falje, Serbia vazhdon të kërcënojë fqinjët e saj dhe të përdorë pakicat etnike si vegël për destabilizim në vend se të ndihmojë integrimin e tyre”, ka thënë ai.

Paqen e qëndrueshme në Evropë, Kurti e ka ndërlidhur me demokratizimin e rajonit dhe me njohjen e ndërsjellë midis Kosovës dhe Serbisë që, sipas tij, do të ndihmonin në këtë aspekt.

“Interesat dhe vlerat duhet të jenë të ndara. Kemi të bëjmë me një dialog për njohje të ndërsjellë midis Kosovës dhe Serbisë, njohja e ndërsjellë dhe demokratizimi i këtij rajoni kontribuon në paqen e qëndrueshme në Evropë”, ka thënë ai.

Ai ka thënë se në vend se të ballafaqohet me të kaluarën dhe të distancohet nga kriminelët e luftës që kanë kryer gjenocid në vendet përreth, Serbia glorifikon kriminelët e luftës dhe të kaluarën imperialiste.

“Arsyeja kryesore dhe e vetmja pse shohim tensione gati në çdo vend të Ballkanit Perëndimor është që agresori që ka nisur të gjitha luftërat në ish-Jugoslllavi refuzon të marrë përgjegjësi përsipër. Në vend të pranimit, njohjes së rolit të vet, dëshiron të portretizojë dallimet në gjithë rajonin si burim i konfliktit. Gati 24 vjet pas gjenocideve në Bosnjë e Kosovë, Serbia nuk pranon asnjë lloj krimi, nuk ka kërkuar asnjëherë falje e nuk ka marrë përgjegjësi. Në të kundërtën lidershipi i tashëm që ka qenë në fuqi në atë kohë, flet për humbje të territorit dhe i glorifikon kriminelët”, është shprehur më tej ai.

Kurti ka kritikuar edhe Bashkimin Evropian, duke thënë se në vend se ta sanksiononte agresionin serb ndaj fqinjëve, e ka shpërblyer Serbinë me miliarda euro investime të BE-së dhe avancim drejt anëtarësimit në Bllok.

“Bashkimi Evropian në vend se të sanksiononte agresionin serb ndaj fqinjëve të saj e ka shpërblyer me miliarda investime të BE-së dhe avancim drejt anëtarësimit të BE-së, derisa lidershipi serb ka kuptuar se për të marrë investimet e tilla të BE-së, pranimi i fajësisë nuk ishte detyrues, ishte e mundur që Serbia të merrte paratë e BE-së duke refuzuar vlerat evropiane. Në përpjekje për të qenë neutral ndaj statusit të Kosovës, ata janë bërë neutral ndaj agresionit të Serbisë ndaj fqinjëve të vet dhe neutral ndaj mungesës së vëmendjes së Serbisë ndaj vlerave evropiane”, ka thënë ai.

© KOHA. Të gjitha të drejtat janë të rezervuara.