Asociacioni i Gazetarëve të Kosovës ka dënuar gjuhën denigruese ndaj gazetarit Bujar Vitija, pas një serie shkrimesh që i ka publikuar rreth dyshimeve për korrupsion në Spitalin Publik të Vushtrrisë.
AGK-ja ka konsideruar se kjo gjuhë e përdorur ndaj Vitijës e pengon punën e tij dhe të gazetarëve të tjerë.
“Asociacioni i Gazetarëve të Kosovës është njoftuar nga gazetari, Bujar Vitija, për një seri fyerjesh, linçimesh e kërcënimesh që i janë bërë në ditët e fundit, pas një serie shkrimesh rreth dyshimeve për korrupsion në Spitalin Publik të Vushtrrisë. AGK-ja e dënon gjuhën e përdorur ndaj gazetarit Vitija, dhe konsideron se ajo pengon punën e tij dhe të gazetarëve të tjerë. Të gjitha organet duhet ta bëjnë punën e tyre profesionale, për të zbardhur ngjarjet rreth akuzave të ngritura”, thuhet në reagimin e AGK-së.
Të enjten është publikuar një raport për të drejtat e njeriut për vitin 2022 për Kosovë nga organizata Human Rights Watch (HRW), ku janë përmendur edhe kërcënimet dhe frikësimet ndaj gazetarëve.
Në këtë raport është trajtuar edhe çështja e keqtrajtimit të gazetarëve në Kosovë, sulmet dhe kërcënimet ndaj tyre dhe reagimit të dobët të organeve të shtetit.
Sipas raportit, në periudhën janar-gusht 2022, nga Asociacioni i Gazetarëve të Kosovës janë regjistruar 22 raste të sulmeve, katër raste më shumë të regjistruara se në vitin 2021 për ngacmimet dhe kërcënime ndaj gazetarëve dhe organeve të medias.
© KOHA. Të gjitha të drejtat janë të rezervuara.
