Rohde: Kosova ende s’ka një propozim për Asociacionin
Ambasadori gjerman në Kosovë, Jorn Rohde, ka bërë thirrje edhe një herë që të gjitha marrëveshjet e Brukselit duhet të zbatohen, përfshirë Asociacionin.
Për Asociacionin e komunave me shumicë serbe, Rohde ka theksuar se Kosova ende s’ka një propozim, por sipas tij, duhet formuar në përputhje me Kushtetutën.
“Plotësisht dakord me Cholletin se është koha e fundit që të gjitha marrëveshjet e Brukselit të zbatohen me shpejtësi, duke përfshirë krijimin e Asociacionit në përputhje me Kushtetutën e Kosovës. Propozimi nga Kosova ende nuk është aty”, ka shkruar Rohde në Twitter.
Ambasadori gjerman tutje ka thënë se është e nevojshme që serbët e dorëhequr të kthehen menjëherë në institucionet e Kosovës.
“Tërheqja e serbëve nga institucionet nuk është në përputhje me marrëveshjet e Brukselit. Kthimi i menjëhershëm është i nevojshëm dhe duhet të lehtësohet nga të gjithë. Dua të nënvizoj se BE/SHBA janë plotësisht në linjë”, ka shkruar ai.
Ndërkombëtarët vazhdojnë të këmbëngulin për krijimin e Asociacionit. Këshilltari i Departamentit Amerikan të Shtetit, Derek Chollet, qëndroi të mërkurën për një vizitë në Kosovë, teksa ka thënë se Asociacioni duhet të krijohet në përputhje me Kushtetutën. Bashkë me të ishte edhe i dërguari special i SHBA-së për Ballkanin Perëndimor, Gabriel Escobar, që pati qëndrim të njëjtë.
Por mendim tjetër ka kryeministri Albin Kurti. Kurti vazhdon të theksojë se Kushtetuta e Kosovës nuk e lejon krijimin e një Asociacioni.
