Franca lavdëron SHBA-në e BE-në për heqjen e barrikadave në veri
Foto: Driton Paçarada / KOHA
Franca ka përshëndetur njoftimin për heqjen e barrikadave në veri të Kosovës pas 20 ditësh bllokimi. Meritat për këtë ia ka dhënë Bashkimit Evropian dhe Shteteve të Bashkuara të Amerikës.
Serbë lokalë kanë bllokuar disa rrugë në veri të vendit qe 20 ditë, pas arrestimit të ish-policit Dejan Pantiq, nën dyshimin për sulm ndaj Policisë dhe Komisioneve Komunale Zgjedhore. Të mërkurën, atij iu ndryshua masa nga paraburgimi në arrest shtëpiak. Një ditë më pas, të enjten nisi heqja e barrikadave.
“Mirëpresim njoftimin se bllokadat në veri të Kosovës do të hiqen dhe përgëzojmë përpjekjet e BE-së dhe SHBA-së për ta arritur këtë rezultat. U bëjmë thirrje autoriteteve serbe dhe kosovare që të vazhdojnë të punojnë me konstruktivitet për të ulur tensionet në terren dhe për të vazhduar drejt një marrëveshjeje për normalizim raportesh përmes dialogut të lehtësuar nga BE-ja. Të gjitha zotimet e bëra si rezultat i këtij dialogu duhet të implementohen”, thuhet në një njoftim të Ministrisë së Jashtme të Francës të enjten pasdite.
