Arbëri

Kurti pret takim me KFOR-in për të “sqaruar gjithçka” rreth veriut

Barrikadat ne Bernjak

Kur janë bërë 15 ditë qëkur rruga për në veri të Kosovës është e pakalueshme shkaku i barrikadave të vendosura nga serbët lokalë, kryeministri Albin Kurti ka bërë të ditur që për këtë çështje do ta ketë një takim me KFOR-in, pas Krishtlindjes. Takimi është paralajmëruar në kohën kur nga misioni i NATO-s në Kosovë është bërë e ditur se zgjidhja e tensioneve në veri duhet të kërkohet nëpërmjet dialogut

Kryeministri i Kosovës, Albin Kurti ka paralajmëruar takim me komandantin e misionit të NATO-s në Kosovë, KFOR-i për ta sqaruar situatën me barrikadat e vendosura tash e 15 ditë në veriun e Kosovës. Pas Krishtlindjes, ka qenë afati që ka dhënë ai.

Të shtunën në konferencë për media ka thënë se i ka dhënë mjaftueshëm kohë KFOR-it për veprim, teksa ka thënë se situata në veri nuk mund të tolerohet pafundësisht, tash kur janë bërë dy javë prej se rrugët në drejtim të pikave kufitare me Serbinë, në Bërnjak e Jarinjë, janë të bllokuara.

“Meqë sonte është Krishtlindja, ne duhet ta kemi shumë shpejt, pas Krishtlindjeve, një takim me komandantin e KFOR-it e në të cilin besoj se do të sqarojmë gjithçka. Por kjo s’mund të tolerohet pafundësisht. U bënë dy javë e s’mund të lejojmë që edhe javë e javë të kalojnë e të mos kemi lirinë e lëvizjes. Nga ai takim që e presim menjëherë pas Krishtlindjes besoj se do të sqarohet gjithçka e do të japim përgjigje”, ka thënë Kurti.

Kryeministri ka thënë se këto barrikada nuk janë civile duke lënë të kuptohet se ato janë të dirigjuara nga struktura ilegale e nga shtetit fqinj. Ka thënë se janë 11 barrikada në veri të lumit Ibër dhe po pengojnë lirinë e lëvizjes.

“KFOR-i gjithmonë është zotuar për ambient të qetë e të sigurt me vlerë kryesore lirinë e lëvizjes. Ka qenë vlera kryesore të cilën e ka afirmuar KFOR-i në këto 23 vjet e më shumë të pasluftës në Kosovë. Edhe ne i kemi dhënë kohë KFOR-it pikërisht për shkak se liria e lëvizjes është konsideruar vlera themelore në Kosovë nga pikëpamja e KFOR-it. E tash lirinë e lëvizjes nuk e kemi, sepse janë 11 barrikada, që siç e dini, s’janë civile, si të protestuesve francezë më 1968 në Paris, por janë të uniformuar, të armatosur e të pozicionuara asisoj që më shumë kanë të bëjnë për ta mbrojtur personin e uniformuar e armatosur që të shtinë mbi veturat që vijnë sesa të mos lejojnë tejkalimin e automjeteve në anën tjetër të barrikadës”, ka thënë Kurti.

Ky paralajmërim i Kurtit ka pasuar deklaratën e lëshuar një ditë më parë nga KFOR-i, në të cilën shprehet kërkesa që zgjidhja rreth situatës në veri të gjendet nëpërmjet dialogut.

“KFOR-i ka shtuar praninë dhe patrullimet gjatë muajve të fundit. Ne mbetemi vigjilentë dhe plotësisht të aftë për të përmbushur mandatin, sipas Rezolutës 1244 të vitit 1999, për të gjitha komunitetet në Kosovë. Zgjidhjet duhet të kërkohen nëpërmjet dialogut. Është e rëndësishme që të gjithë të përfshirët të shmangin çdo retorikë apo veprim që mund të shkaktojë tensione dhe të përshkallëzojë situatën”, ka deklaruar KFOR të premten.

Në Bashkimin Evropian nuk kanë bërë të ditur nëse lidhur me çështjen do të zhvillohet një rund i ri i negociatave në Bruksel.

Zëdhënësi i BE-së, Peter Stano, në një përgjigje për “Kosovapressin” ka shprehur angazhimin e vendeve të bllokut evropian për lehtësimin e situatës në veri.

“BE-ja, së bashku me partnerët e saj, vazhdon të angazhohet plotësisht në lehtësimin e deeskalimit të situatës në veri të Kosovës, në mënyrë që të sigurohet një mjedis i sigurt, i qetë, dhe liria e lëvizjes për të gjithë qytetarët në Kosovë. Përfaqësuesi i lartë, Borrell, ishte shumë i qartë javën e kaluar se barrikadat duhet të hiqen. Borrell dhe Lajçak janë në kontakt të vazhdueshëm me të gjithë akterët dhe do të vazhdojnë ta bëjnë këtë, pikërisht siç e ka përshkruar tashmë përfaqësuesi i lartë. Kur është fjala për takimet e radhës të dialogut, si gjithmonë, ne do të njoftojmë nëse ka dhe kur të jetë e përshtatshme”, ka thënë Stano.

Serbët lokalë kanë bllokuar rrugët duke thënë se veprimin e kanë bërë si protestë ndaj arrestimit të ish-policit serb të Policisë së Kosovës, Dejan Pantiq, si të dyshuar për sulm ndaj Policisë së Kosovës dhe Komisionit Qendror Zgjedhor.

Por shqetësimin rreth tensioneve në veri e ka shprehur edhe politikani gjerman e ish-emisari evropian për statusin e Kosovës, Wolfgang Ischinger.

“Thellësisht i shqetësuar për tensionet e vazhdueshme. Veprimi/roli vendimtar i BE-së urgjent. A është vënë në dijeni Serbia se nxitja e dhunës në shtetin fqinj, Kosovë, do ta bënte të pamundur vazhdimin e procesit të anëtarësimit në BE”, ka thënë Ischinger, të shtunën.

Ministri i Punëve të Brendshme, Xhelal Sveçla, pati paralajmëruar se në rast se kjo forcë ndërkombëtare nuk vepron drejt heqjes së barrikadave, atëherë veprimi do të ndërmerret nga institucionet e Kosovës.

“Mënyra më e mirë është largimi i atyre që i kanë vendosur. I kemi të gjitha kapacitetet e nevojshme për largim të barrikadave. Presim sa më parë të veprohet nga KFOR-i. U bënë 13 ditë dhe situata vazhdon të jetë e njëjtë, apo mund të themi që është renduar. Po presim që sa më shpejt të largohen dhe nëse kjo nuk ndodh, ne kemi kapacitete për ta bërë vetë”, ishte shprehur Sveçla.

Të shtunën rreth largimit të barrikadave në veri ka folur edhe kryeministrja e Serbisë, Ana Brnabiq. Ajo ka thënë se nuk beson në një skenar në të cilin Policia e Kosovës do të largonte me forcë barrikadat në veri të Kosovës.

“Unë nuk besoj në një skenar të tillë. Ka kuptim të mjaftueshëm nga ana e aktorëve ndërkombëtarë, mbi të gjitha KFOR-it”, ka thënë Brnabiq.

Ajo vuri në dukje bashkëpunimin e mirë me KFOR-in, si dhe seriozitetin e treguar sepse siç ka thënë, ata janë ende duke e shqyrtuar kërkesën e Serbisë për kthimin e një pjese të forcave në Kosovë sipas Rezolutës 1244.

Prej 10 dhjetorit, rrugët që çojnë në pikat kufitare Jarinjë e Bërnjak kanë mbetur të bllokuara, për shkak të barrikadave të vendosura nga serbët e veriut.