Këta nxënës të klasës së parë, njëjtë si bashkëmoshatarët e tyre, rrezikojnë të mos i fitojnë të gjitha njohuritë, pasi procesi për kompensimin e dyzetedy ditëve mësimore të humbura, nuk është duke u zhvilluar.
Prindërit po vazhdojnë kundërshtimin për t’i dërguar fëmijët e tyre në shkollë, pasi vlerësojnë se mbajtja e mësimit gjatë të shtunave, nuk ka efekt.
E në Ministri të Arsimit thonë se ky proces është duke u realizuar ashtu siç e parasheh kalendari i rishikuar shkollor. Sipas tyre, në javët e fundit, pjesëmarrja e nxënësve ka qenë më e madhe.
Pretendimet e MASHT-it i mohon komuniteti shkollor.
Në ditët e shtuna të parapara nga Ministria e Arsimit që zëvendësohen orët mësimore, në shkollën “Pavarësia” në kryeqytet mbi 90 për qind e nxënësve kanë munguar.
“E shtuna e parë ka filluar me vështirësi, e dyta ka qenë më e suksesshme, në të tretën prapë kemi pasur mungesë mbi 90 për qind të nxënësve dhe vazhdimisht, ka ardhur duke rënë dhe në shtunën e katër dhe të pestë, asnjë nxënës nuk kemi pasur në shkollë, përkundër asaj që unë, sekretarja e shkollës, zëvendës drejtori kemi dalë në punë, edhe mësimdhënësit”, tha drejtori i shkollës “Pavarësia”, Shefki Rusinovci.
Fejzullah Morina, mësimdhënës për ciklin e ulët, tregon se orët e parapara për forcimin e leximit për nxënësit e klasës së parë mund të mos realizohen.
“Çka është me rëndësi te këta, për shembull të klasa e parë, shkronjat do të realizohen gjithsesi, mandej është përforcimi dhe leximi në fund të klasës së parë, aty ndoshta do të mbetët pak, por meqenëse shkalla e parë, vazhdon edhe në klasën e dytë, klasa prej 1 dhe 2, atëherë mendoj që përforcimi i leximit do të bëhet në klasën e dytë”, tha Morina.
Në Sindikatën e Bashkuar të Arsimit kanë thënë se kalendari duhet të rishikohet përsëri. Për këtë kanë kërkuar që ministria të bashkëpunojë me prindërit dhe mësimdhënësit në mënyrë që zëvendësimi i orëve të zhvillohet në tërësi.
Pas grevës së mësimdhënësve që zgjati më shumë se një muaj, Ministria publikoi kalendarin e ri për kompensimin e orëve, në të cilën është paraparë që për nivelin fillor dhe të mesëm të ulët, tetë ditë të humbura të mësimit të kompensohen gjatë tetë të shtunave.
Krahas kësaj, do të punohet edhe 10 ditë më shumë, pas riorganizimit të dy gjysmëvjetorëve. Gjithashtu, edhe gjatë pesë ditëve të pushimit pranveror do të mbahet procesi arsimor.
© KOHA. Të gjitha të drejtat janë të rezervuara.
