Policia e Kosovës ka përgënjeshtruar raportimet se ish-pjesëtari i MUP-it serb Dejan Pantiq është keqtrajtuar.
Policia ka thënë se Pantiq është trajtuar mjaft mirë konform rrethanave të krijuara. Po ashtu janë siguruar edhe barnat për të.
Pantiqit i është caktuar masa e paraburgimit prej 30 ditëve për “akte terroriste” dhe “sulm ndaj rendit Kushtetues”.
Pantiq, ish-polic i Kosovës, akuzohet se ishte prapa sulmeve ndaj zyrtarëve të KQZ-së e Policisë së Kosovës në veri, e po ashtu ndaj zyrave të komisionit komunal zgjedhor.
Në mediumet serbe ishte raportuar se Pantiqi është keqtrajtuar dhe se nuk i janë ofruar barna. Këtë e kanë thënë familjarët e Pantiqit.
“Po ashtu në vazhdimësi e kemi bërë të ditur se Policia e Kosovës punën e bazon në vlerat e saja si profesionalizmi, përgjegjësia dhe integriteti, në kuadër të të cilave ofron siguri dhe trajton të gjithë qytetarët pa dallime. Andaj, spekulimet e vazhdueshme nga persona të caktuar dhe disa media kryesisht serbe, përfshirë spekulimin e fundit të publikuar përmes video-mesazhit, se gjoja zyrtarët policorë nuk e kanë trajtuar si duhet dhe nuk i kanë ofruar barnat mjekësore personit të dyshuar (D.P.), njofton dhe sqaron se: I njëjti është trajtuar mjaft mirë konform rrethanave të krijuara, ndaj të njëjtit janë respektuar të drejtat njerëzore që i takojnë personit të ndaluar, i janë lexuar të drejtat e tij, i është ofruar avokati mbrojtës si dhe i është lejuar përdorimi i barnave mjekësore. Po ashtu Policia e Kosovës ka arritur që të sigurojë barnat e nevojshme për personin e ndaluar”, thuhet në njoftimin e Policisë.
Policia ka bërë të ditur se pikat kufitare në Jarinjë e Bërnjak mbesin të mbyllura, si pasojë e vendosjes së barrikadave.
“Aktet kriminale, vendosja e barrikadave, sulmet me armë zjarri e mjete shpërthyese, kanë vështirësuar punën e institucioneve të sigurisë, kanë cenuar lirinë e lëvizjes së lirë të qytetarëve dhe mallrave, por nuk kanë ndaluar punën e Policisë së Kosovës e cila në vazhdimësi është angazhuar maksimalisht në ofrimin e sigurisë ndaj të gjithë qytetarëve dhe vendit. Duke marrë për bazë situatën e krijuar, bllokimin e rrugëve nga grupet kriminale, të cilat vetë po pengojnë qytetarët dhe komunitetin në lëvizjen e lirë, në qasjen dhe shërbimet e nevojshme, kanë bërë që të krijohen rrethana të reja të punës në të gjitha rastet në veri të vendit. Edhe përkundër këtyre rrethanave të krijuara, Policia e Kosovës po angazhohet në të gjitha format që t’iu dalë në ndihmë kërkesave dhe nevojave të qytetarëve pa dallime”, thuhet nga Policia.
© KOHA. Të gjitha të drejtat janë të rezervuara.
