Inspektorati Policor i Kosovës (IPK) ka filluar hetimet preliminare për pretendimet e drejtorit të organizatës joqeveritare “Aktiv”, Miodrag Milliqeviq, se është në pikën kufitare në Jarinjë është sulmuar nga pjesëtarë të Njësisë Speciale të Policisë së Kosovës.
Këtë e ka konfirmuar zyrtari për informim i IKP-së, Arbër Beka.
“Inspektorati Policor i Kosovës ju konfirmon se ka filluar një hetim preliminar bazuar në pretendimet e ankuesit dhe sipas kërkesës së Ministrisë së Punëve të Brendshme”, ka theksuar Beka.
Sipas pretendimeve të Milliqeviqit, rasti ka ndodhur mëngjesin 14 nëntorit.
Ndaj akuzave që janë bërë publike në një komunikatë për media të “Aktivit” të hënën, ka reaguar edhe ministri i Brendshëm, Xhelal Sveçla. Ai ka thënë se drejtori ekzekutiv i OJQ-së, “Aktiv” nuk ka paraqitur ndonjë ankesë dhe se njoftimin për këtë e ka marr nga mediat.
Sveçla në një shkrim në Facebook, ka theksuar se ka kërkuar raport nga zyrtarët policor të kufirit dhe hetim të këtyre pretendimeve nga IPK-ja. Për rezultatet e hetimit ai ka thënë se qytetarët do të njoftohen në kohë rekorde.
Policia e Kosovës në një njoftim të lëshuar të hënën ka mohuar pretendimet e Milliqeviqit.
“Sot (e hënë), në orën 09:28 personi në fjalë (M. M.) me automjetin e tij, është paraqitur në vendkalimin kufitar SPK-Jarinjë dhe pas përfundimit të procedurave kufitare i njëjti pa asnjë problem ka vazhduar në drejtim të Republikës së Serbisë. Vlen të potencohet se ndaj të njëjtit nuk ka pasur asnjë incident apo maltretim siç deklarohet apo aludohet në shkrimet e publikuara”, thuhet në reagimin e policisë.
KOHA të martën ka provuar që të marr një qëndrim nga vetë Milliqeviq lidhur me pretendimet si dhe mohimin e tyre nga ana e Policisë se Kosovës, por ai nuk është lajmëruar.
Për pretendimet e Milliqeviqit, të martën kanë reaguar edhe disa organizata të shoqërisë civile.
26 nënshkruesit e këtij reagimi i kanë dal në mbrojtje Milliqeviqit dhe kanë vlerësuar se “sulmi reflekton dhe kontribuon në përkeqësimin e atmosferës për besim dhe bashkëjetesë paqësore në Kosovë”. Sipas tyre gjendja në veri ka arritur shkallë alarmante të përshkallëzimit me tërheqjen e përfaqësuesve serbë nga institucionet e Kosovës.
“Ne gjithashtu i bëjmë thirrje komunitetit ndërkombëtar që të demonstrojë urgjencë të përshtatshme në angazhimin e tyre me krizën aktuale. Ne i dalim në krah kolegut tonë, Miliqeviq, dhe bëjmë thirrje që incidenti të trajtohet në përputhje me kornizat përkatëse ligjore në fuqi”, thuhet në reagim.
Sipas komunikatës së organizatës “Aktiv”, Milliqeviq, “është ndaluar nga forcat speciale të Kosovës, është ndarë nga kolona dhe gjatë marrjes në pyetje, një pjesëtar i policisë speciale e ka goditur me grusht në bark”.
“Në të njëjtën kohë, ka pasur edhe ngacmime verbale, pasi policët i kanë bërtitur Milliqeviqit, i kanë kërkuar të heshtë dhe e kanë pyetur se përse nuk ka dokumente të Kosovës”, thuhet në komunikatë.
© KOHA. Të gjitha të drejtat janë të rezervuara.
