Shtohet patrullimi i EULEX-it në veri, Sveçla: Situata është e qetë
107 zyrtarët serbë dhanë dorëheqje nga pozita e policit kufitar, në shenjë pakënaqësie me vendimin e Qeverisë së Kosovës për riregjistrimin e makinave që kanë targa ilegale serbe.
Në pikën kufitare në Bërnjak, zyrtarët policorë serbë të cilët gjatë ditës së djeshme dorëzuan fletëdorëheqjet e tyre, sot kanë marrë gjësendet e tyre personale për t’u larguar përfundimisht nga ky institucion.
Prani e shtuar e misionit ndërkombëtar EULEX është parë të hënën në pikat kufitare. Ky mision, në një përgjigje për Radio Evropën e Lirë, ka konfirmuar shtimin e patrullimeve, por ka mohuar raportimet e mediave serbe se ka marrë përgjegjësinë në stacionet e katër komunave veriore.
Ministri i Punëve të Brendshme, Xhelal Sveçla, ka vlerësuar se situata në veri është e qetë.
Në një konferencë për media, Sveçla ka treguar edhe numrin e zyrtarëve policorë serbë të dorëhequr deri më tash.
“Zyrtarisht janë paraqitur 578 dorëheqje, prej të cilave 461 nga Policia e rendit publik, 107 nga Polica kufitare dhe 10 nga hetimet”, tha Sveçla.
Me gjithë dorëheqjet, Policia e Kosovës ka potencuar se ka kapacitete për menaxhimin e situatës dhe rrethanave të krijuara në veri.
Përveç në polici, dorëheqje gjatë ditës së hënë pati edhe në prokurori e gjyqësor.
Këshilli Prokurorial i Kosovës njoftoi se 10 prokurorë nga komuniteti serb kanë dhënë dorëheqje në Prokurorinë Themelore të Mitrovicës. E, rreth 150 serbë janë larguar nga pozitat e tyre në Gjykatën Themelore në Mitrovicë.
Pas dorëzimit të dorëheqjes, zyrtarë serbë të gjyqësorit kanë treguar se kolegët e tyre shqiptarë janë duke i trajtuar vetëm lëndët e natyrës urgjente.
“Gjatë gjithë mëngjesit jemi marrë vesh me kolegët, kemi bërë një plan të mirë që të mos humbim asnjë afat, që gjithçka të shkojë mirë. Kolegët tonë shqiptarë kanë marrë lëndët tona, që janë të natyrës urgjente. Në këtë moment, vlerësoj se ata do të kenë problem të madh se si do të organizohen. Në jemi përpjekur që t’u ndihmojmë aq sa mundemi”, tha Liljana Stevanoviq, kryetare e Gjykatës Themelore në Mitrovicë.
“Sot, gjyqtarët që nuk kanë ardhur dje për të dorëzuar dorëheqjen në Këshillin Gjyqësor të Kosovës, e kanë bërë këtë përmes e-maileve zyrtare. Kolegët tanë, gjyqtarë dhe punonjës administrativë shqiptarë, mbeten në gjykatë. I gjithë stafi administrativ dhe gjyqtarët serbë kanë dhënë dorëheqje”, tha gjyqtari Nikolla Kabashiq.
Këshilli Gjyqësor dhe ai Prokurorial i Kosovës kanë bërë të ditur se do të mbajnë mbledhje të jashtëzakonshme për të vendosur për hapat e mëtejmë.
