Sipas drejtorit të Institutit EPIK, Demush Shasha, të gjitha lëvizjet e fundit në raportin Kosovë-Serbi janë përpjekje të presidentit të Serbisë, Aleksandar Vuçiq, për të krijuar një mjedis të favorshëm brenda Serbisë që ai të portretizohet si shpëtimtar e për të lëvizur drejt planit franko-gjerman.
Duke komentuar situatën e fundit në veri, ku serbët njoftuan për largim nga të gjitha institucionet e Kosovës, Shasha ka thënë se krijimi i “kësaj drame është shenjë e dobësisë”.
“Kur pa që po dështon pushtimi i Ukrainës, Rusia bënte thirrje përfaqësuesve të institucioneve Ukrainase të largohen nga institucionet e tyre. Sot Vuçiqi në Kosovë sillet sikur Putini në Ukrainë. Por sikur Putini, Vuçiqi është duke e realizuar këtë strategji shumë dobët”, ka shkruar ai në Facebook.
Shasha ka numëruar lëvizjet që megjithatë nuk kishin bërë që të tërhiqej Lista Serbe nga institucionet e Kosovës. Sipas tij, lëvizja e re e Serbisë po shfrytëzon targat si arsye për të krijuar një mjedis politik brenda Serbisë për të çuar kah plani franko-gjerman.
“Lista Srpska nuk është tërheq nga institucionet e Kosovës kur është: Shkarkuar Jabllanoviqi; Vrarë Oliver Ivanoviq; Arrestuar Marko Gjuriqi; Vendos taksa 100%; Realizu një numër aksionesh në veriu gjatë vitit 2021. E sot po tërhiqet për “qortime” të targave? Prandaj, e para, këtë nonsens të targave duhet hequr nga rendi ditës. Tani nëse targat nuk janë arsye: çfarë po ndodh? Unë besoj se Vuçiqi po ndërton narracion dramatik publik brenda Serbisë për të krijuar mjedis politik i cili do t’i lejon të lëviz drejt marrëveshjes franko-gjermane. Pra ai po ndërton një narracion dramatik përmes (1) ngritjes së aeroplanëve luftarak për të rrëzuar dronat, (2) ngritjes së gatishmërisë ushtarake; (3) realizimit të ushtrimeve ushtarake; (4) largimit të Listës Srpska nga institucionet; (5) organizimin e protestës së nesërme në Mitrovicë. Pra të gjitha këto lëvizje kanë një të përbashkët: ngritjen e një narracion dramatik publik në Serbi i cili do të krijonte mjedis të favorshëm politik për të portretizuar Vuçiqin si shpëtimtar i vetëm i Serbisë në ‘rrethanat jashtëzakonisht të vështira nacionale dhe ndërkombëtare’”, ka shkruar Shasha.
Serbët që kanë punuar në institucionet e vendit të shtunën kanë dhënë dorëheqje. Gjatë dorëzimit të detyrës kryetari i Listës Serbe, njëherësh ministër në Qeverinë e Kosovës, Goran Rakiq, paralajmëroi se vendimi do të vlejë derisa Kosova të mos zmbrapset nga qëndrimi për konvertimin e targave dhe ta themelojë Asociacionin e Komunave me Shumicë Serbe. Largimi i serbëve nga institucionet ka nxitur reagime të shumta. Kryeministri Kurti u ka bërë thirrje të mos bien pre e manipulimeve, presidentja Osmani largimin e ka quajtur synim për destabilizim e opozita ka kritikuar ekzekutivin vendor. Serbët kanë paralajmëruar edhe një protestë në qendër të Mitrovicës së Veriut për të dielën.
Plani franko-gjerman, sipas vetë Vuçiqit, parasheh që të mos ketë njohje të ndërsjellë, por që Serbia të mos e pengojë rrugën e Kosovës drejt njohjes ndërkombëtare, e për Serbinë sjell rrugë të përshpejtuar drejt Bashkimit Evropian.
© KOHA. Të gjitha të drejtat janë të rezervuara.
