Arbëri

BE: Kosova ta themelojë Asociacionin e ta shtyjë vendimin për targa, serbët të kthehen në institucione

Bashkimi Evropian i ka bërë thirrje Qeverisë së Kosovës që ta nisë menjëherë themelimin e Asociacionit të komunave me shumicë serbe e që ta shtyjë afatin për konvertimin e targave nga ato ilegale serbe në RKS. Ndërkaq serbëve të Kosovës u ka kërkuar që të kthehen në institucione.

Në reagimin për situatën e shkaktuar të shtunën, pasi serbët vendosën të largoheshin nga institucionet e Kosovës, në një deklaratë për media të shtunën vonë, Bashkimi Evropian ka thënë se “zhvillimet e fundit në raportet midis Kosovës dhe Serbisë i vënë në rrezik shumë vjet punë dhe arritjesh në kuadër të dialogut të ndërmjetësuar nga BE-ja, ndërmjet Beogradit dhe Prishtinës dhe pengojnë situatën e sigurisë në rajon e më gjerë”.

BE-ja ka bërë thirrje për shtensionim e përmbajtje nga veprimet e njëanshme.

“Tërheqja e serbëve të Kosovës nga institucionet e Kosovës nuk është zgjidhje për telashet aktuale. Ka potencial që ta përshkallëzojë më tej tensionet në terren”, thuhet në deklaratën e BE-së, nënshkruar prej përfaqësuesit të lartë të BE-së, Josep Borrell.

Ndërkaq në kërkesat direkte për palët, BE-ja ka bërë thirrje që serbët të kthehen në institucionet e Kosovës, ndërsa nga Qeveria e Kosovës ka kërkuar të nisë menjëherë themelimin e Asociacionit dhe të shtyjë afatin për konvertim të targave ilegale në ato RKS.

“Ftojmë Serbinë dhe përfaqësuesit e serbëve të Kosovës që të respektojnë obligimet e tyre në dialog dhe të kthehen në institucionet e Kosovës për t’i kryer detyrat e tyre, përfshirë Policinë, gjyqësorin e administratat lokale. Në të njëjtën kohë BE-ja kërkon nga autoritetet e Kosovës që të respektojnë obligimet e tyre pa vonesa. Kjo nënkupton që menjëherë të zgjatet procesi i riregjistrimit të veturave dhe të pezullohen veprimet ndëshkuese ndaj mbajtësve të targave KM. Çështja e targave mund të zgjidhet nga palët në dialog. BE-ja po ashtu fton Kosovën që të nisë menjëherë hapat për themelimin e Asociacionit të komunave me shumicë serbe. Kuvendi i Kosovës ka ratifikuar Marrëveshjen e Brukselit dhe Gjykata Kushtetuese ka vendosur që Asociacioni duhet të themelohet. Prandaj, themelimi i tij është obligim ligjor për Kosovën. Dështimi i vazhdueshëm për ta zbatuar këtë obligim cenon parimin e sundimit të ligjit dhe dëmton reputacionin dhe kredibilitetin e Kosovës”, thuhet në deklaratë.

BE-ja ka thënë se është përgjegjësi e të dyja palëve të sigurojnë paqen dhe stabilitetin.

“Çdo veprim, përfshirë djegien e veturave apo retorika frikësuese që mund të çojë në tensione, është i papranueshëm dhe do të nxisë reagim të duhur nga komuniteti ndërkombëtar”, ka thënë tutje BE-ja.

Bashkimi Evropian ka thënë po ashtu se në koordinim të afërt me NATO-n, Policinë dhe EULEX-in është i gatshëm për të siguruar stabilitet në terren.

“BE-ja u kërkon palëve të zgjedhin rrugën e dialogut dhe të përmbahen nga çdo veprim që do të çonte në dhunë e konfrontim. BE-ja është e gatshme të vazhdojë lehtësimin e negociatave, por të dyja palët duhet të tregojnë gatishmëri për të kërkuar zgjidhje në mënyrë konstruktive dhe të respektojnë obligimet nga dialogu”, përfundon komunikata e BE-së.

Të shtunën serbët në veri vendosën për largim nga të gjitha institucionet e Kosovës. Vendimin e arsyetuan me shkallëzimin e sanksioneve që e nisi Qeveria për ata që nuk i kthejnë targat nga ilegale në RKS. Nga 1 nëntori ka nisur qortimi i mbajtësve të targave ilegale, ndërsa më vonë është paraparë gjobitja e targat provuese deri në ndalim të plotë. Për shkak se në veri u kundërshtua ky vendim, u suspendua drejtori i Policisë në këtë zonë, Nenad Gjuriq. Bashkimi Evropian ka kërkuar që ky afat të shtyhet për 10 muaj.

Paraprakisht Qeveria pati shtyrë për një periudhë afatin me kërkesë të partnerëve.