Nxënësit i kualifikojnë shkollat si jo të sigurta: Jo të gjitha incidentet raportohen në Polici
Institucionet e arsimit parauniversitar janë vlerësuar si të pasigurta nga nxënësit. Bulizmi, dhuna fizike, ngacmimet seksuale e dhunimet, janë disa nga dukuritë negative që nxënësit thonë se ballafaqohen në objektet shkollore, që, sipas tyre, jo të gjitha këto raste raportohen në Polici. Për parandalimin e tyre kërkohet urgjentisht angazhimi i psikologëve.
Rreth dy javë pasi që ka filluar procesi mësimor, ndërkaq të hënën e kësaj jave është raportuar për një therje mes nxënësve në gjimnazin më të madh në kryeqytet “Ahmet Gashi”.
Drejtori i gjimnazit, Haxhi Metaj, ka thënë se kanë ndërmarrë masa ndaj rastit.
“Ne i kemi marrë masat e duhura, do të thotë në bashkëpunim edhe me prindin, nxënësin e kemi larguar nga shkolla. Ka qenë edhe dëshira e prindërit që të largohet, në mënyrë që të qetësohet situata. Nuk është lëndim i rëndë, ka qenë një konflikt i rastit, ata kanë qenë edhe shokë shumë të ngushtë, jemi habitur”, ka thënë Metaj.
Për t’i parandaluar rastet e tilla, nxënësit e vlerësojnë si urgjente angazhimin e një psikologu në këtë institucion, si dhe futjen e ligjëratave për mbrojtjen nga dukuritë negative.
“Për mendimin tim një psikolog i rregullt na kishte ndihmuar shumë për bulizmin për rastet, për gjithçka, me një fjalë, të komunikojë me nxënës, të shprehen nxënësit me një psikolog”, ka thënë Malësor Veseli, nxënës në gjimnazin “Ahmet Gashi”.
“Unë mendoj që në të gjitha shkollat duhet të kemi më shumë ligjërata për vetëdijesimin e nxënësve, sepse ne jemi në një moshë që na nevojitet dhe sa më shumë ndihmë që mundemi me marrë kishte me qenë sa më mirë”, ka thënë nxënësja Rea Bistrazhini, nxënëse në gjimnazin “Ahmet Gashi”.
Rreth 12 psikologë janë të punësuar në shkollat e Prishtinës, për 57 institucione të arsimit parauniversitar.
Kushtrim Maloku, i cili është psikolog në dy shkolla, ka thënë se angazhimi i profesionistëve të shëndetit mental evidenton rastet e dhunës.
Por ai ka theksuar se është e vështirë evidentimi i rasteve për shkak të hezitimit të nxënësve që të vizitojnë psikologun.
“Kemi raste kur vetë prindërit, ndonjë prind e dërgon te një psikolog privat vetëm që mos ta dijë dikush nga komuniteti i lagjes apo i shkollës që po vjen te psikologu i shkollës, sepse e shohin si diçka jonormale”, ka thënë Maloku.
Këshilli i Nxënësve të Kosovës ka vlerësuar se institucionet arsimore parauniversitare janë të pasigurta për nxënësit.
Bulizmi, dhuna fizike, ngacmimet seksuale e dhunimet, janë disa nga problemet që nxënësit thonë se ballafaqohen në objektet shkollore. Sipas tyre, jo të gjitha këto raste raportohen në Polici.
“Shumica e shkollave nuk iu përmbahen rregullave ashtu siç duhet dhe rastet që ndodhin brenda ata mundohen që t’i fshehin dhe kjo për mua është shumë gabim”, ka thënë Elion Adem nga Këshilli i Nxënësve të Kosovës.
549 incidente në dhe përreth objekteve të institucioneve arsimore janë evidentuar gjatë vitit të kaluar shkollor, shifër kjo që bazuar në të dhënat nga Policia përbën rritje krahasuar me katër vjetët paraprakë.
