Korrespondenti i KOHËS në Bruksel, Augustin Palokaj, deklaroi se të enjten, do të mblidhet një grup punues në Bashkimin Evropian për ta diskutuar çështjen e liberalizimit të vizave.
Ai tha të mërkurën në emisionin “60 Minuta”, se i tërë ky proces mund të përfundojë deri në fund të këtij viti, nëse procesi ka mbështetjen e vendeve anëtare.
“Nesër ka grup punues në Këshill për vizat, nesër nuk merret vendimi për viza, por vetëm nis diskutimi. Do të shihet a ka mbështetje nga shtetet anëtare dhe a mund të lëvizet. Bashkimi Evropian para se gjithash është union politik. Kemi raste kur Ukraina e Moldavia morën statusin e kandidatit. Me vullnet politik mund të përshpejtohen procedurat. Në rastin e Kosovës, ka vullnet politik, por askush s’pranon të përmend data. Këtu mjafton shumica, por edhe kur s’ka unanimitet, kërkohet të ketë unanimitet, pasi të gjitha shtetet do të jenë të obliguara të zbatojnë vendimin, pa marrë parasysh cili ka qenë qëndrimi i tyre kur kanë votuar”, deklaroi Palokaj të mërkurën.
Ai tha se versioni më optimist është që të përmbyllen procedurat në Këshill, e pastaj me vendim të autoriteteve të BE-së, procesi të përmbyllet në fund të këtij viti.
Sipas gazetarit të KOHËS, në Raportin e Progresit, Serbia asnjëherë më shumë se tash nuk ka marrë kritika, e me theks të veçantë sipas Palokajt, u kritikua për mosvendosje të sanksioneve ndaj Rusisë.
Palokaj tha se Kosova shënoi progres në disa fusha, por që ka ende punë për të bërë.
“Bazuar në atë që kam lexuar, është evidente se ka progres në disa fusha. Progres i mirë në disa çështje, me rëndësi është pjesa politike që konfirmohet nga Komisioni se Kosova i ka përmbushur kriteret. Më shumë pritet në fushën e luftimit të krimit, në konfiskimin e pasurisë së paligjshme e të tjera”, tha ai.
Siç u shpreh Palokaj, kritika të ashpra pati ndaj Kuvendit të Kosovës, për shkak të mungesës së kuorumit të vazhdueshëm në seanca.
“Është vlerësuar qëndrimi i luftës në Ukrainë dhe përshtatja me qëndrimet e BE-së. Kosova për BE-në s’është shtet, por është mirëpritur që këtë e ka bërë. Duhet lexuar me vëmendje sepse Komisioni manipulon me fjalorin që përdor. Komisioni Evropian e di se Kosova ka qen nën presion për trustin e këtu thotë se ka mbajtur stabilitetin fiskal”, tha ai.
Kosova u kritikua në Raportin e Progresit për mos lëvizjen në dialog me Serbinë.
© KOHA. Të gjitha të drejtat janë të rezervuara.
