Ish-ministri i Energjisë dhe Minierave gjatë periudhës 2006-2008, Ethem Çeku, gjatë raportimit në Komisionin Hetimor në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv e rregullator tha se sektori i energjisë ka pasur shumë zhvillime dramatike dhe se Kosova ka mbetur i vetmi vend që pas çlirimit nuk ka zhvilluar asnjë kapacitet energjetik.
Çeku tha se të gjitha kompetencat në sektorin e energjisë në periudhën 2007 i ka pasur përfaqësuesi special i Kombeve të Bashkuara dhe AKM-ja.
Ai tha se roli i tij si ministër i Energjisë dhe Minierave në atë kohë ka qenë më shumë moral. Ndërsa, theksoi se gjatë mandatit të tij ishte ideja për ndërtimin e një termocentrali të ri, por që ndaj këtij projekti u ngrit një fushatë e egër dhe më pas pati zgjedhje në vitin 2007. Ai tha se më pas u ndërrua ideja për ndërtimin e këtyre kapaciteteve nga 1000 Mgë në 500, gjë që ndikoi në ikjen e katër konsorciumeve të mëdha për ndërtimin e këtij termocentrali.
Ai shtoi se nuk ka pasur rezistencë nga banorët e asaj ane ku mund të ndërtohej termocentrali, duke qenë se plani, tha ai, ka qenë që banorët të zhvendosen.
Ish-ministri Çeku tha se problemi kryesor ishte çka të bëhet me Kosovën A, dhe se kishte ide që për Kosovën A të merret një ekskavator i madh “e të bëhej rrafsh sepse po e ndot mjedisin, por që këtë ide nuk e kanë mbështetur”.
“Ne nuk e kemi mbështetur, edhe sot nuk e mbështes dhe është gabim që nuk i kemi rehabilituar dhe me 50 milionë mund të bëhej rehabilitimi i Kosovës A dhe të mos kishim sot këso telashesh”, tha ai.
Ish-kryetari i Bordit të KEK-ut për periudhën 2006-2008 , Fatmir Rexhepi, tha se nëse Ethem Çeku nuk ka arritur ta bëjë termocentralin C askush nuk do të mund ta ndërtojë atë. Ai tha se fushata e egër e bërë nga shoqëria civile e ka penguar ndërtimin e këtij termocentrali.
“Besoj se në vitin 2008 ka mundur të bëhej tenderimi dhe me përfundu deri në 2015, 1000 megavat dhe pastaj pjesa tjetër dhe krejt kjo është bërë me qëllim qe Kosova të importojë energji. Kundërshtimi që e kemi pasur ka qenë shoqëror. Sorosi nuk ka kanë lënë gurë e dru kundër termocentraleve duke u thirrur se po ndotet ambienti. Kemi bërë shumë përpjekje e në të njëjtë kohë ndërtoheshin termocentrale në Beograd dhe financimi i shoqërive civile që tani po del të jetë nga gaspromi e penguan ndërtimin. Përgatitjet që ka bërë ministria në kohën e Ethem Çekut nëse ai nuk ka ndërtuar termocentral në Kosovë askush nuk do të mund ta ndërtoj. Nuk është dashur me pengu ndërtimin e termocentralit C. Sa i përket vendimmarrjes ka qenë kolegiale, kemi qenë katër anëtar dhe me votë”, theksoi ai./ KP
