Kryetarja e Forumit të Gruas e Lidhjes Demokratike të Kosovës, Jehona Lushaku-Sadriu, ka thënë se Qeveria po i dënon dhe “disiplinon” mësimdhënësit, teksa komentoi mosekzekutimin e pagave për kohën që ata kanë qenë në grevë.
Lushaku-Sadriu ka thënë se ekzekutivi është tallur me mësimdhënësit, duke mos menduar për dëmin që u është shkaktuar nxënësve me tejzgjatjen e grevës.
“Qeveria njëherë dënoi nxënësit dhe tani po i dënon dhe disiplinon mësimdhënësit. Disiplinim në vend të drejtës për grevë, për të ju shërbyer edhe si shembull të tjerëve. A është ky drejtimi që ka marrë shteti jonë; duke disiplinuar qytetarët dhe punëtorët publik? Në vend të talljes me mësimdhënësit duhet të mendohet për dëmin dhe frikën që i është shkaktuar nxënësve dhe prindërve, si asnjëherë në historinë e arsimit të Kosovës”, ka shkruar Lushaku-Sadriu në Facebook.
Sipas saj, “ndëshkimi” i mësimdhënësve me ndalje page krijon krizë shoqërore.
“E gjithë kjo në kohën kur qeveria i mbanë paratë larg nga investimi dhe qarkullimi në ekonominë e vendit në kohë krize. Si është e mundur që ‘Qeveria me rritjen më të madhe ekonomike ndonjëherë'- siç thonë- të ndëshkojë shtyllën e arsimit, mësimdhënësit? Do të thotë rritja ekonomike, nuk nënkupton rritje mbështetjeje për arsimin”, është shprehur më tej ajo.
Shefja e Grupit Parlamentar të Lëvizjes Vetëvendosje, Mimoza Kusari-Lila, teksa foli për grevën pas mbledhjes së Kryesisë së Kuvendit, të hënën, tha se Ligji nuk parasheh kompensim të grevistëve për ditët që nuk punojnë.
“Me Ligjin mbi grevën parashihet që punëtorët qoftë në sektorin publik, qoftë në atë privat, ata të cilët janë pjesë e grevës së deklaruar, sipas rregullave të parapara me ligj, nuk kompensohen për ditët të cilat nuk janë në vendin e punës”, ka thënë ajo.
E për moskompensim të pagës, shefi i GP së PDK-së, Abelard Tahiri, ka paralajmëruar kallëzim penal ndaj ministrit të Financave, Hekuran Murati.
© KOHA. Të gjitha të drejtat janë të rezervuara.
