Kryeministri i Kosovës, Albin Kurti, është pritur të mërkurën, nga kryeministri i Japonisë, Fumio Kishida.
Kurti përmes një postimi në Facebook ka bërë të ditur se me Kishidan ka folur për investime të mundshme japoneze në Kosovë e po ashtu e ka ftuar atë për vizitë në Kosovë.
Takimi Kurti-Kishida është realizuar në ditën e dytë të vizitës së Kurtit në Japoni. Kurti shkoi në këtë vend për shkak të funeralit të ish-kryeministrit japonez, Shinzo Abe.
“Në ditën e dytë të qëndrimit në Tokio, në rezidencën shtetërore në Pallatin Akasaka, na priti për vizitë Kryeministri i Japonisë, Fumio Kishida. I shpreha edhe njëherë ngushëllime në emër të popullit dhe qeverisë së Kosovës për vdekjen tragjike të ish Kryeministrit Shinzo Abe, si dhe e falënderova për ndihmën e mbështetjen e vazhdueshme japoneze për zhvillimin e Kosovës. Tregova për të arriturat socio-ekonomike të Kosovës dhe interesimin tonë për investime nga Japonia, teksa konfirmova pjesëmarrjen tonë në EXPO Osaka 2025. Japonia është vend shumë i rëndësishëm i G7, me të cilën ne ndajmë pikëpamje të njëjta vlerore dhe strategjike. Në fund të takimit Kryeministri Kishida më tha të përcjell përshëndetjet e tij për popullin e Kosovës, kurse unë e ftova ta vizitojë Kosovën në një të ardhme të afërt”, ka shkruar Kurti.
© KOHA. Të gjitha të drejtat janë të rezervuara.
