1 perditesime
Arbëri

Pajaziti mohon se opozita po e keqpërdor grevën, fajtor e bën Kurtin

Pajaziti mohon se opozita po e keqpërdor grevën, fajtor e bën Kurtin
Foto: KTV
23:36

Pajaziti mohon se opozita po e keqpërdor grevën, fajtor e bën Kurtin

Ish-ministri i Punëve të Brendshme, tani anëtar i Kryesisë së Partisë Demokratike të Kosovës, Zenun Pajaziti, i është përgjigjur kryeministrit Albin Kurti, i cili në seancën e së enjtes, në Kuvendin e Kosovës, ka thënë se opozita po e përdor grevën e përgjithshme si armë kundër tij.

I ftuar të enjten në Interaktiv të KTV-së, Pajaziti ka thënë se PDK-ja e konsideron të pamoralshme përdorimin e kësaj situate si parti opozitare.

“Asnjëherë në asnjë rast, PDK-ja e as partitë tjera opozitare nuk i kanë keqpërdorur (grevat), madje ne nuk kemi bërë plan tonin se si të veprojmë tash në kohën kur kjo Qeveri po atakohet nga grevat. Kemi konsideruar që është e pamoralshme që ne ta përdorim këtë si opozitë. Madje nuk është parë asnjë sjellje të asnjë deputeti të PDK-së që do të kërkonte apo inicionte hap apo do të ndezte zjarrin sa i përket kësaj çështje”, ka thënë ai.

Sipas tij, ajo që po ndodhë aktualisht është kokëfortësi nga ana e Qeverisë.

“Është në dorën e kryeministrit që të ulet dhe të bëjë zgjidhje sa i përket kësaj greve. Këta e kanë në dorë, është kokëfortësi. Është buxheti, është një ligj para, është një vullnet i palës tjetër që të ulen e të bisedojnë, është e pakuptueshme se si sot derisa ne po flasim kryesindikalisti dhe kryeministri nuk po ulen për t’u marrë vesh që të paktën të hënën të fillojë mësimi”, është shprehur Pajaziti.

Sa i përket termit “vëlla” që Kurti tha më 13 shtator se është përdorur nga ana e Rrahman Jasharajt në takimin e mbajtur midis tyre, Pajaziti konsideron se nuk do të duhej të përdorej për tallje, pasi sipas tij, në rrethana të caktuara edhe kryeministrat e vendeve të rëndësishme për Kosovën, janë thirrur vëllezër mes vete.

“Nëse kryesindikalisti e ka quajtur vëlla, kryeministri doli me tallje. Në disa prej relacioneve të rëndësishme politike, në disa prej vendeve që janë esencialisht të rëndësishme për ne, kryeministrat e kanë quajtur njëri-tjetrin vëlla, përveç Shqipërisë. Imponohen situata të tilla. Kryeministrit i duken të gjithë që janë kundërshtarë të tij. Ta themi që qëllimi i kryeministrit është ta thyejë sindikatën, cili është efekti? Kush fiton nga kjo? Ne duhet të përballemi me kërkesat ditore, javore, nuk është e thënë që të gjitha duhet të jenë të paramenduara”, ka thënë Pajaziti.

23:23

Pajaziti për dialogun social: Kurti ra nga provimi

Anëtari i Kryesisë së Partisë Demokratike të Kosovës, Zenun Pajaziti, deklaroi se nuk ka pritur që kryeministri i Kosovës, Albin Kurti, “të bie nga provimi në menaxhimin e dialogut me Sindikatën e Arsimit”.

Ai deklaroi të enjten në Interaktiv të KTV-së, se Lëvizja Vetëvendosje gjatë opozitës ka përdorur retorikë për të drejta të barabarta e barazi sociale, ndërsa sipas Pajazitit, VV-ja po e dëshmon të kundërtën.

“Nuk u pa asnjë qasje, ide apo sinjal se kjo çështje duhet të mbyllet. Mbesim me shpresën që të përfundojë greva. PDK-ja ka propozuar një pako masash që janë të përballueshme edhe me aftësitë buxhetore që kemi. Një pako buxhetore që e lehtëson jo vetëm këtë situatë, por edhe jetën e qytetarëve, për ta përballuar këtë fazë të dimrit që po vjen”, deklaroi Pajaziti.

Ai shtoi se kryeministri Kurti po pretendon se të gjithë i janë shndërruar në armiq.

“Kjo është absurde, ne e kemi trajtuar ndryshe si koncept. Janë menaxhuar gjithmonë qëllimet tona me dialog. Por, të ndodhë një bllokadë e tillë dhe të quhen sindikatat si të manipuluara. Kurti mendon se të gjithë tani janë armiqtë e tij. E padrejtë të mbulohet me retorikë një kërkesë legjitime e arsimit. Ne nuk kemi interferuar në këtë, as nuk jemi palë që zgjidhim problemin”, shtoi Pajazitaj.

Sipas ish-deputetit të PDK-së, Qeveria po e trajton me kokëfortësi situatën e krijuar me grevën e përgjithshme.

“Kemi pritur që sot (të enjten v.j.) të ketë njëfarë përfundimi të një marrëveshjeje mes sindikatës dhe Qeverisë. Të mos ketë nevojë për seancë e as për rezolutë. Pritjet ishin të mëdha, një kohë e gjatë e mbylljes së shkollave është një dëm i madh që po iu behet shkollave. Nuk e pritem një kokëfortësi që po bëhet”, tha tutje ai.