“Karteli ‘Sinaloa’, aleat me mafian shqiptare”. Kështu e nisi shkrimin e saj faqja meksikane e ‘El Universal’, në të cilin ka analizuar se përse karteli numër një në trafikun e kokainës në botë, ka shtrirë rrjetin e tij në vendet e Evropës Lindore dhe se përse ka zgjedhur pikërisht mafian shqiptare për bashkëpunim.

Autoritet e inteligjencës meksikane kanë zbuluar se drejtuesi i një fraksioni të kartelit të “Sinaloas”, Ismael Zambada García, i njohur si El Mayo, është aleat me mafian shqiptare. Për informacionin që ndihmon në kapjen e tij, Shtetet e Bashkuara të Amerikës madje kanë ofruar 15 milionë dollarë. Ky personazh, sipas shkrimit të “El Universal”, ka krijuar lidhje të ngushta me vëllezërit shqiptarë Luftar, Arben, Fatos dhe Ramiz Hysa.

Mungesa e kontrollit nga autoritetet shqiptare ndaj pastrimit të parasë thuhet të ketë qenë faktoi kryesor i lidhjes së kartelit meksikan me mafian shqiptare.

Sipas raportit, nëpërmjet bashkëpunimit po investohen shuma të mëdha parash në Shqipëri për t’i pastruar ato, derisa investimet janë të fokusuara në aktivitetet e lojërave të fatit dhe në fushën e turizmit. Katër shqiptarët raportohet se zotërojnë një rrjet kazinosh dhe biznesesh në Sonora, Baja California dhe Quintana Roo.

Plani i përbashkët i të dyja organizatave kriminale, që i ndajnë më shumë se 10.600 kilometra distancë, është të shpërlahen me miliona dollarë të fituara me punë ilegale nëpërmjet investimeve në patundshmëri dhe në sektorin turistik bregdetar në Gadishullin e Ballkanit.

Kjo lidhje është një mundësi për meksikanët që të zgjerohen në Shqipëri, një vend i vogël ish-komunist që po joshet nga paratë prej aktiviteteve të paligjshme, shkruajnë mediumet në Meksikë e Argjentinë.

Ky grup shqiptar, sipas shkrimit, ka lidhje edhe me “Kartelin e Gjeneratës së Re”. Para aleancës me, “El Mayo”, shqiptarët kishin lidhje vetëm me trafikantët kolumbianë dhe ekuadorianë të drogës në Amerikën Latine, shkruan “El Universal”. Lajmi u përhap në shumicën e vendeve latine në dy ditët e fundit.

Por përse u zgjodh mafia shqiptare?

Në periudhën 2018 - 2020, nga numri i përgjithshëm i të arrestuarve për trafik me kokainë në Evropë, 266 kishin shtetësi shqiptare, përcjellë nga brazilianët (257) dhe kolumbianët (168). Shteti i radhës evropian që paraqitej në këtë listë ishte Holanda në vendin e tetë me 51 të arrestuar.

Raporti gjurmoi prezencën e grupeve mafioze shqiptare në Evropë dhe në Amerikën Latine. Sipas organizatës së specializuar “Insight Crime”, Europoli identifikoi dallim të madh te trafikimi me narkotikë ndër grupet shqiptare krahasuar me aktivitetet tjera kriminale. 94 për qind e grupeve kriminale shqiptare më 2019 kishin për aktivitet kryesor trafikimin me narkotikë krahasuar me 38 sa ishte përqindja te akterët kriminalë gjermanë apo 30% te turqit.

Gjatë profilizimit të veprimtarive kriminale, Europoli dhe Zyra e Kombeve të Bashkuara për Luftimin e Drogës dhe Krimit zbuluan se trafikantët shqiptarë ishin ndërmjetësit kryesorë të kokainës në portet e Amberit në Belgjikë dhe Roterdamit në Holandë; kontrollonin pjesë të madhe të tregut të kokainës në Britaninë e Madhe; bashkëpunonin me ‘Ndranghetan’ në Itali dhe e luanin një rol shumë të rëndësishëm në shpërndarjen e kokainës në tregje të tjera evropiane, përfshirë ato të Gjermanisë , Belgjikës, Austrisë, Bullgarisë, Greqisë dhe Zvicrës.

Dominimi në treg iu atribuua kryesisht aftësisë së trafikantëve shqiptarë për të vendosur kontakte të drejtpërdrejta në Amerikën Latine. Që nga 2012-a, sipas raporteve të sigurisë, bota e krimit shqiptar e ka konsoliduar ndikimin e vet në Kolumbi, Venezuelë, Brazil dhe Ekuador me qëllimin e sigurimit të një fluksi të vazhdueshëm të kokainës.