1 perditesime
23:13

Zenka: Qeveria Abazoviq do të bjerë, pritet formimi i një qeverie teknike

Deputeti i Malit të Zi, Mehmet Zenka, ka thënë se Qeveria e Dritan Abazoviqit pritet të bjerë brenda një ore. Ndërsa ka thënë se pret që të formohet një qeveri e re teknike që do të merret me përgatitjet për zgjedhje.

“Pavarësisht se oferta e tij ishte joshëse, ne nuk do të përkrahim atë. Unë pres që brenda një ore të bëhet votimi për mosbesimin e tij. Nesër me të vërtetë, mandati i kthehet presidentit Gjukanoviq, që ditët e ardhshme do të shohim hapat që do të marrë. Nëse do t’i ofrojë mandatin për formim të Qeverisë dikujt tjetër, apo, siç besoj unë, do të kemi qeveri teknike për një periudhë 4-5 muajshe që do të merret ekskluzivisht me përgatitjen e kushteve sa më të mira demokratike për mbajtjen e zgjedhjeve të reja parlamentare”, ka thënë Zenka i Unionit Demokratik i Shqiptarëve në Interaktiv të KTV-së.


Zenka: Përkrahja e “Ballkanit të Hapur” ishte thikë pas shpine për Malin e Zi e Kosovën

Deputeti shqiptar në Mal të Zi, Mehmet Zenka, ka thënë se kryeministri malazez Dritan Abazoviq me përkrahjen e iniciativës “Ballkani i Hapur” i ka dhënë thikë prapa shpinës Malit të Zi dhe Kosovës.

“Ai ka marrëdhënie të shkëlqyera me kryetarin e Serbisë dhe Shqipërisë, por me kreun e Kosovës nuk i ka, pasi janë në kundërthënie politikat e tyre. Ishte njeri pro politikës së ‘Ballkanit të Hapur’. Është një ndër arsyet pse jemi kundër tij. E shohim se ideja që përkrahet prej tij, është thikë prapa shpine për Malin e Zi dhe rrezik i madh për shtetin e Kosovës. Është ndër arsyet kryesore pse duam largimin e tij”, ka thënë Zenka në Interaktiv të KTV-së.

Zenka që është nga Unioni Demokratik i Shqiptarëve, ka thënë se me rrëzimin e Qeverisë pritet të përfundohet edhe karriera politike e Abazoviqit.

“Nëse votohet mocioni i mosbesimit karriera e tij do të zgjasë deri në zgjedhjet që na presin muajin e ardhshëm. Lufta kryesore e tij do të jetë në parti të vetë, që do të mundohet ta ndërrojë, njerëzit që e kanë prodhuar e konsumuar. Shumë shprejt pres të jetë mall i konsumuar politik. Partia e tij do të paraqitet me rryma tjera, ata që e kanë ngritur në qiell do ta përplasin përtokë, politikisht e kam fjalën”, ka thënë Zenka.

23:07

Zenka: Abazoviqit i bie ndër mend që është shqiptar kur i lëkundet karrigia

Deputeti i Kuvendit të Malit të Zi, Mehmet Zenka, ka thënë se kryeministri malazez Dritan Abazoviq nuk ka fare të drejtë të përmend se është shqiptar.

Zenka nga Unioni Demokratik i Shqiptarëve në Mal të Zi, ka thënë se Abazoviqit po i bie në mend që është shqiptar vetëm kur po i lëkundet karrigia.

Abazoviq në seancën në Kuvendin e Malit të Zi tha se po e rrëzojnë atë vetëm që është shqiptar.

“Abazoviqit i ka ra në mend sot që është shqiptar, i bie në mend që është shqiptar kur i dridhet karrigia. Më së paku të drejtë ka të flasë për atë, një shqiptar që bashkëpunon me partitë serbe, e kam thënë edhe para disa orëve, bashkëpunon me partitë serbe që Kosovën e quajnë shtet terrorist, e vlerat e shqiptarëve i quajnë anti-vlera me fjalë më fyese. Në ato momente nuk është shqiptar, si guxon tash të quhet shqiptar”, ka thënë Zenka në Interaktiv të KTV-së.

Zenka ka thënë se Abazoviq me nënshkrimin e Marrëveshjes Themelore me Kishën Ortodokse Serbe ka dëmtuar Malin e Zi.

Zenka ka thënë si Union Demokratik i Shqiptarëave duan të shkarkohet Abazoviq pos për Marrëveshjen Themelore edhe për përkrahjen e parezervë të “Ballkanit të Hapur”.

“E shohim këtë si thikë prapa shpine për Malin e Zi dhe për Kosovën”, tha Zenka.