Arbëri

Zhan Mitrev hetohet për veprën penale “mashtrim”, rrezikon 10 vjet burg

Mitrevi, pronar i spitalit privat të kardiologjisë “Zhan Mitrev” në Shkup, sipas njoftimit nga Prokuroria Publike në Maqedoninë e Veriut, gjatë periudhës kohore nga prilli i vitit 2020 deri në vitin 2022, me qëllim të përfitimit të mjeteve financiare, i ka mashtruar pacientët, të cilët ishin duke u trajtuar për COVID-19 me metodën e hemofiltrimit. Në rast se zyrtarizohet akuza dhe ai shpallet fajtor, në bazë të dispozitave të Kodit Penal, Mitrevi mund të dënohet deri me 10 vjet burg

(REL) – Prokuroria Themelore Publike në Shkup ka njoftuar të premten se ka marrë vendimin për nisjen e hetimeve kundër Zhan Mitrevit, pronarit të Spitalit privat të kardiologjisë, nën dyshimin se ka kryer vepër penale të mashtrimit, sipas neni 247, paragrafi 4 në lidhje me paragrafin 1, të Kodit Penal të Maqedonisë së Veriut, ka raportuar Radio Evropa e Lirë.

I dyshuari, sipas njoftimit nga Prokuroria Publike, në periudhën nga prilli i vitit 2020 deri në vitin 2022, Mitrevi me qëllim të përfitimit të mjeteve financiare i ka mashtruar pacientët, të cilët ishin duke u trajtuar për COVID-19 me metodën e hemofiltrimit.

Në rast se zyrtarizohet akuza dhe ai shpallet fajtor, në bazë të dispozitave të Kodit Penal, Mitrevi mund të dënohet deri me 10 vjet burg.

Vendimi i Prokurorisë është marrë pas një hulumtimi të rrjetit IRL nga Maqedonia e Veriut, i cili ka ngritur dyshime për trajtimin joadekuat të dhjetëra pacientëve në “Zhan Mitrev”, që kanë përfunduar me fatalitete.

Sipas këtij hulumtimi, dyshohet se pacientët që kanë pësuar i janë nënshtruar filtrimit të gjakut, si pjesë e një eksperimenti.

Ky trajtim, sipas hulumtimit nga IRL-ja, ka infektuar dhjetëra pacientë “me baktere vdekjeprurëse”, ndërsa Spitali e ka aplikuar pa leje nga Agjencia shtetërore për Medikamente dhe Pajisje Mjekësore.

Prokurori publik kompetent, duke marrë parasysh rrethanat, ka dorëzuar në Gjykatën Themelore Penale të Shkupit propozimin për caktimin e masës së sigurisë për të dyshuarin, konfiskimin e dokumenteve të tij të udhëtimit, si dhe të dokumenteve të tjera për kalimin e kufirit shtetëror.

“Kjo masë është propozuar për shkak të domosdoshmërisë për të siguruar praninë e të dyshuarit dhe mbarëvajtjen e procedurës hetimore”, është bërë e ditur në njoftimin nga Prokuroria Publike në Shkup, ka raportuar Radio Evropa e Lirë.

Kallëzime penale kundër spitalit privat të kardiokirurgjisë "Zhan Mitrev" në Shkup kanë ngritur edhe tetë familje, të cilat kanë humbur të afërmit e tyre. Në mesin e tyre është edhe familje nga Prishtina, i biri i të cilës kishte vdekur në këtë Spital në dhjetorin e vitit të kaluar, pasi që i është nënshtruar metodës së trajtimit me filtrimin e gjakut, të kryer në mënyrë joadekuate.

Nga trajtimi i tillë besohet të kenë humbur jetën 24 persona.