Nagavci: Gjetjet e Auditorit në vlerësimin e teksteve shkollore, shqetësuese

Ministrja e Arsimit, Arbërie Nagavci, njoftoi se janë shqetësuese gjetjet e auditorit të brendshëm mbi kriteret e përzgjedhjes së recensentëve, vlerësimit të dorëshkrimeve dhe materialeve mësimore.

Nagavci shkroi në Facebook të enjten, se sipas auditimit, në vlerësimin e teksteve të reja shkollore, të hartuara për periudhën 2018-2019, pati shumë parregullsi ligjore, administrative e profesionale.

“Menjëherë më 1 korrik 2022, këto gjetje i kam dorëzuar në Njësinë për Hetimin e Krimeve Ekonomike dhe Korrupsion të Policisë së Kosovës. Shndërrimi i botimit të teksteve shkollore në mundësi përfitimi ilegal për grupe të ndryshme të interesit ka ndikuar negativisht në tërësi procesin dhe cilësinë e teksteve shkollore. I bëj thirrje Policisë dhe Prokurorisë që të trajtojnë me prioritet gjetjet e Auditorit”, shkroi Nagavci.

Në dokumentin e auditorit, që Nagavci e publikoi në Facebook, thuhet se procesi i vlerësimit të teksteve është zhvilluar duke i mbledhur të gjithë recensentët së bashku në një hotel që të punojnë bashkërisht për vlerësimin e teksteve shkollore.

“Kjo është në kundërshtim me Udhëzimin Administrativ nr.18/2018, që kërkon që recensentët të jenë të pavarur në punën e tyre dhe ata të punojnë individualisht në vlerësimin e teksteve”, thuhet në gjetjet e auditimit.

Në dokument potencohet se emrat e recensentëve nuk duhet bërë publik deri në shpalljen e rezultatit të konkursit, ndonëse organizimi ua ka mundësuar “qëndrimin dhe shoqërimin me njëri-tjetrin”.

“Qëndrimi ditor për secilin anëtar në hotel në Shqipëri ka kushtuar nga 60 deri në 91 euro për një natë, varësisht nga suita e zgjedhur. Sipas burimeve të Njësisë së Auditimit të Brendshëm, qëndrimi ditor në atë periudhë për një person ishte përgjysmë apo edhe trefishi nga çmimi i paguar nga MASHTI-i”, thuhet tutje në dokument.

Nagavci u shpreh se beteja ndaj keqpërdoruesve në proces të përzgjedhjes dhe botimit të teksteve shkollore, nuk do të ndalet.