3 perditesime
21:10

Mustafa: Çdo qeveri ka dështuar rëndë me shëndetësinë

Profesori i ekonomisë, Muhamet Mustafa, vlerëson se çdo qeveri ka dështuar rëndë në zhvillimin e shëndetësisë.

Sipas tij, Kosova aktualisht i ka shpenzimet më të vogla të GDP-së për shëndetësinë në rajon, derisa ka thënë se pagat e mjekëve në QKUK janë tepër të vogla.

“Shpenzimet qeveritare të Kosovës në shëndetësi janë diku 3.2 deri në 3.4% të GDP-së. Shqipëria e ka 6%, Maqedonia 7%, Serbia, Mali i Zi dhe Bosnja e kanë nga 9%.Pagat e mjekëve specialistë në QKUK, janë 590 euro. Që 50 vjet në QKUK nuk mund t’i bësh të gjitha analizat e gjakut, që është një gjë bazike. Çdo qeveri në Kosovë ka dështuar rëndë në këtë pikë. Unë kam besim të plotë në dr. Latifin por ai duhet të kërkojë nga Qeveria urgjent që kjo të korrigjohet. Kosova duhet të mbërrijë bile te Shqipëria. Shikoni sa para shkojnë jashtë për shërim”, ka thënë Mustafa.

Sipas, rritja e pagave të mjekëve deri në 1.700 euro nuk do të kishte ndikim të madh në buxhetin e Kosovës.

“Asgjë nuk ndodhë me buxhetin e Kosovës nëse shëndetësia e rrit këtë 6% dhe asgjë nuk ndodh që mjekëve, prej të cilëve varet jeta e njerëzve, paga t’u rritet në bazë të përgjegjësie dhe përvojës, duke ua bërë 1.200-1.700”, është shprehur Mustafa.


Mustafa: Jo ndihma për të gjithë, duhet targetim

Profesori i ekonomisë, Muhamet Mustafa, deklaroi se Qeveria nuk është dashur t’i ndihmojë të gjithë qytetarët me nga 100 euro pasi sipas tij, një shumë e madhe e parave ka mundur të investohet diku tjetër.

Ai deklaroi në DESK-un e KTV-së të enjten se 50-60 milionë euro kanë mundur të shkojnë në blerjen e pajisjeve për analizë shëndetësore, në mënyrë që qytetarët të mos e kërkojnë këtë shërbim në klinika private.

“Qeveria duhet t’i tregojë llogaritë, t’i dokumentojë kostot e politikës. Edhe opozita duhet ta tregojë pse po e kërkojnë këtë. Lehtë është të thuash hiqe akcizën, por duhet të tregosh dhe ta dokumentosh atë pse. Edhe opozita edhe pushteti duhet t’i tregojnë kostot dhe përfitimet sociale. Qeveria duhet t’i targetojë ata që kanë nevojë, s’ka nevojë t’u japë të gjithë qytetarëve 100 euro. Më mirë do të ishte që me ato 50-60 milionë të bliheshin pajisjet për analiza”, deklaroi Mustafa.

 

 

20:54

Mustafa për “Ballkanin e Hapur”: Transformimi rajonal përmes tij është iluzion

Ekonomisti Muhamet Mustafa, ka thënë se problemi me “Ballkanin e Hapur” është fakti që Serbia, e cila është pjesë e saj, nuk ka kredibilitet.

Sipas tij, një vend pa kredibilitet nuk mund të jetë forcë motorike e një iniciative, derisa ka shtuar se transformimi i ekonomisë së Ballkanit përmes bashkëpunimit rajonal është vetëm një iluzion.

“Problemi me Ballkanin e Hapur është se Serbia nuk ka kredibilitet. Një vend që ka probleme me fqinjët, ai vend nuk ka kredibilitet të jetë forcë motorike e një iniciative. Ekonomitë në Ballkan më tepër janë konkurruese me njëra-tjetrën sesa që janë komplementare. Ekonomitë e Kosovës dhe Shqipërisë janë të vetme në Ballkan që janë komplementare. Por të pritet që do të transformohet ky rajon nëpërmjet bashkëpunimit rajonal, ai është vetëm një iluzion”, ka thënë Mustafa në “Desku” të KTV-së të enjten.

Ai ka folur edhe për marrëdhëniet ekonomike mes Kosovës e Shqipërisë, duke thënë se problemi kryesor në tregti mes dy vendeve janë ende lobet importuese që sipas tij, krijojnë probleme sidomos për eksportet e Kosovës.

20:49

Mustafa: Dëmi që Serbia ia ka bërë Kosovës – 22 miliardë dollarë

Profesori i ekonomisë, Muhamet Mustafa, deklaroi se Serbia ia ka shkaktuar Kosovës rreth 22 miliardë dollarë humbje në periudhën e viteve '90.

Ai tha në DESK-un e KTV-së, të enjten, se Serbia gjatë viteve '90 e ka shkatërruar sistemin financiar, pensional e të tjera.

“Ajo e ka shkatërruar buxhetin e Kosovës prej 950 milionë markave dhe ka mbledhur taksa që i ka çuar në buxhet të Serbisë. I ka mbledhur rreth 500 milionë marka, ndërkohë i kthyer në Kosovë, madje vetëm në pjesët ku jetonin serbët, diku rreth 50 milionë”, deklaroi Mustafa.

Sipas profesorit, Kosova në kohën e ish-Jugosllavisë e ka pasur të drejtën e pasurisë dhe të vetos. Ai tha se për ndërhyrjet që Serbia ia ka shkaktuar Kosovës në buxhet, mund të kërkohet e drejta në një arbitrim ndërkombëtar.

“Jemi të gatshëm edhe për arbitrim ndërkombëtar. Ahtisarii dy gjëra i ka trajtuar: prona e tërë që gjendet në territor i takon popullit të Kosovës, çështja tjetër: borxhet dhe pasuria e federatës. Mund që brenda 6 muajve me ndërmjetësim të arrihet një marrëveshje, nëse jo, të arrihet një arbitrim ndërkombëtar. Një marrëveshje finale me Serbinë do t’i adresojë edhe këto aspekte të pasurisë. Ka probleme të llojllojshme”, shtoi ai.

20:31

Mustafa: Papunësia është zvogëluar në Kosovë për shkak të migrimit

Papunësia është zvogëluar në Kosovë për shkak të rritjes së migrimit, ka thënë profesori i ekonomisë, Muhamet Mustafa.

Mustafa ka thënë në “Desku” të KTV-së, të enjten, se migrimi po paraqet problem me fuqinë punëtore, duke e zvogëluar atë.

“Papunësia është zvogëluar për shkak të migrimit të madh. Mungesa e zhvillimit, mungesa e vendeve të punës, nxit migrimin dhe në këtë mënyrë është krijuar një rreth vicioz që migrimi nesër do të paraqitet problem për fuqinë punëtorë në Kosovë, veç ka filluar në disa sektorë të paraqitet. Nëse vazhdon ky migrim, në dy vitet e ardhshme do të rritet mungesa e fuqisë punëtore më shumë. Pagat në sektorin privat janë rritur shumë pak ose hiq në këto 20 vjet”, ka thënë Mustafa.

Sipas tij, në Kosovë mungon filozofia zhvillimore, derisa ka kritikuar edhe Qeverinë aktuale për mënyren e shpërndarjes së ndihmave për qytetarët.

“Sugjerimi im kryesor do të ishte që duhet të jemi më selektiv edhe te intervenimet tona të krijohet një masë kritike që e përmirëson gjendjen, sepse me kapacitet tona buxhetore, t’i i harxhon paratë por ato e rritin një kërkesë, kërkesën agregate, mirëpo nuk e ndryshojnë shumë gjendjen”, është shprehur Mustafa.