Ish-kreu i Autoritetit të Konkurrencës, Valon Prestreshi, deklaroi se me vendosjen e çmimeve tavan për derivatet, Kosova po rrëshqet drejt sistemit ekonomik socialist.

Ai tha në “60 Minuta” të KTV-së të enjten, se Qeveria aktualisht po krijon kartel të çmimeve, duke mundësuar krijimin e precedentëve nga prodhuesit e tjerë në vend.

“Çka po bën kjo Qeveri tani, vlerësoj se është mënyra më e lehtë që i është qasur. Pra, shkurtimisht, e cakton një çmim fiks dhe thotë tash e tutje do të jetë kaq. Në njëfarë forme, Qeveria po krijon kartel të çmimeve. Kështu thuhet në gjuhën profesionale të konkurrencës, pasi kur nuk kemi mundësi të zgjedhim për çmime, krijohen kartele”, deklaroi Prestreshi.

Sipas tij, Qeveria nuk do të duhej të ndërhynte në caktimin e marzhës së fitimit, pasi siç theksoi ai, Qeveria nuk e dinë se sa bizneset i paguajnë shpenzimet e pagat e punëtorëve.

“Ne i kemi dënuar naftëtarët 4 milionë euro për lëvizje të çmimeve kur 124 për qind ka qenë marzha e fitimit. Naftëtarët janë marrë vesh për caktim të çmimit, ne kemi reaguar dhe gjithçka është zbutur” shtoi tutje ai.

Sipas Prestreshit, kryeministri Albin Kurti e ministri i Financave, Hekuran Murati, po e kthejnë ekonominë vendore në sistem socialist.

“Kurti dhe Murati janë duke e shndërruar ekonominë në një ekonomi socialiste, por kjo është e pranueshme sepse 51 për qind të qytetarëve ia kanë dhanë besimin. Ky (Kurti v.j.) është i majtë dhe ka politika socialiste. Po e përjetojmë dhe po futemi në një ekonomi socialiste, e pranuar nga 51 për qind e qytetarëve. Edhe Autoriteti i Konkurrencës fillon ta humbë funksionin e tij sepse gjithçka kontrollohet nga Qeveria. Çdo avokati apo juristi të mirë i bëj thirrje ta sfidojë vendimin e ministres Hajdari për caktimin e çmimeve në Gjykatën Kushtetuese. Do ta fitojnë lëndën dhe kjo qeveri do ta humbë edhe një rast në Kushtetuese”, tha ai.

Ish-kreu i Autoritetit të Konkurrencës theksoi se nuk mund ta besojë që ministri Murati ka politika të tilla socialiste.

“Jemi të vetëdijshëm që Kurti nuk i njeh çështjet, nuk është ekonomist. Hekuranin e kam pasur koleg në AUK. Por të del një njeri i shkolluar në shkollë amerikane, me politika të majta, nuk e besoj. Ai po bëhet një sahanlëpirës i Kurtit, duhet ta këshillojë Kurtin që të mos bëhet kështu. Ministri Bislimi nuk flet më për çështje të ekonomisë, sepse e dinë që nuk duhet kështu”, tha ai.

Prestreshi potencoi se tregtarët i shfrytëzojnë situatat e tilla kur caktohet marzha, në mënyrë që çmimet t’i mbajnë maksimale, sipas vendimit të Qeverisë. Ai tha se Kosova nuk mund ta përballojë një ekonomi socialiste, pasi “edhe Jugosllavia ka pasur këtë politikë, por ka dështuar”.

“Është shpërbërë ajo ekonomi, janë sprovuar këto ide socialiste, nuk kanë qenë të suksesshme. I kemi marrë politikat e perëndimit. S’ka logjikë të thuash jemi drejt BE-së kur ke politika të lindjes”, shtoi ai.

Prestreshi theksoi se njëjtë si naftëtarët, mund të veprojnë edhe furrtarët, duke i ngritur fillimisht çmimet “e pastaj duke vendosur çmimin më të lartë të marzhës”.