PDK-ja kërkon tërheqjen e projektligjit për pagën minimale
Foto: Driton Paçarada/KOHA
Partia Demokratike e Kosovës i bëri thirrje Qeverisë, të hënën, që ta tërheqë projektligjin për pagën minimale, ta ndryshojë e më pas ta ridërgojë në Kuvend për votim.
Deputeti i PDK-së, Rashit Qalaj, deklaroi të hënën në Prishtinë, se në këtë projektligj nuk janë përfshirë veteranët e UÇK-së, gjë që sipas tij, është e papranueshme të lihen anash.
“I tërë populli ka qenë në luftë, por veteranët të lihen anash, mendoj se është e papranueshme dhe si i tillë, ne këtë ligj nuk do ta votojmë. Në diskutimet e seancës së kaluar, opozita e ka kundërshtuar këtë projektligj në këtë formë. Veteranët e UÇK-së të trajtohen si duhet me këtë projektligj. PDK-ja kërkon që ky projektligj të tërhiqet në Qeveri e të mos votohet. Kërkojmë që lartësia e pagës minimale të ngrihet, pasi shuma nuk mjafton për shpenzimet e kategorive”, deklaroi Qalaj.
Në projektligjin për pagën minimale, nuk janë përfshirë veteranët, për çka edhe kanë protestuar të hënën.
Qalaj theksoi se paga minimale duhet të rritet deri në 350 euro, në mënyrë që kategoritë e luftës “ta kenë jetën më të lehtë”.
“Do t’i përdorim të gjitha mjetet demokratike për ta kundërshtuar këtë ligj. Dua të besoj që VV-ja të na mbështesë që ta kthejnë këtë ligj, ta ndryshojnë e më pas ta votojmë. Ka shumë rëndësi për veteranët ky ligj. Të mos lejojmë që veteranët të mbajnë protesta sot, për shkak të kushteve ekonomike”, tha deputeti opozitar.
Të hënën, në Kuvendin e Kosovës pritet të votohet në parim projektligji për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale.
Paga mininale, sipas projektligjit është propozuar në lartësi 264 euro.
