Dyshime se Rusia po tenton ta destabilizojë rajonin me alarme të rrejshme për bomba
Kosova është bërë cak i kërcënimeve të rrejshme për mjete shpërthyese në institucione, pas një varg kërcënimesh të rrejshme muajve të fundit në Serbi, Mal të Zi, Bosnjë-Hercegovinë dhe në Kroaci. Të gjitha dolën të jenë alarme të rrejshme. Njohësit e sigurisë e shohin këtë situatë si përpjekje të Rusisë për destabilizim të rajonit
Në muajt e fundit shtetet e Ballkanit Perëndimor, sidomos Serbia, u përballën me kërcënime për mjete shpërthyese nëpër institucione të ndryshme. Të gjitha këto rezultuan të jenë alarme të rrejshme.
Pas paralajmërimeve për bombë në institucione arsimore në Serbi e Mal të Zi, edhe në Kosovë pati kërcënime të ngjashme. Më 17 dhe 18 maj u raportua për alarme për mjete shpërthyese në ndërtesën e Rektoratit të Universitetit të Prishtinës dhe në shkollën e mesme “Xhevdet Doda” në kryeqytet.
Informacioni për mjet shpërthyes në Rektorat ishte pranuar drejtpërdrejt në adresën elektronike të këtij institucioni, ndërsa informacioni për mjet shpërthyes në shkollën “Xhevdet Doda” i kishte shkuar Policisë, e cila i evakuoi menjëherë nxënësit. Njësiti anti-bombë, kontrolloi me orë të tëra dy lokacionet, por nuk hasi në asnjë mjet të dyshimtë.
Njohësi i sigurisë në vend, Drizan Shala, alarmet e rrejshme i sheh si synim për krijim të destabilitetit në rajon nga Rusia.
“Probabiliteti është shumë i lartë që mbrapa këtyre kërcënimeve që janë duke u shpërndarë në Ballkan janë strukturat informative të shtetit të Rusisë, pasi qëllimi primar i saj është që ta dislokojë përqendrimin nga lufta në Ukrainë që është duke u zhvilluar, e ta zhvendos në Ballkanin Perëndimor”, ka thënë ai.
Shërbimet e sigurisë të Serbisë kanë identifikuar disa shtete, prej të cilave kanë ardhur raportimet e rrejshme për bomba. Ka pasur ditë kur në këtë vend fqinj janë raportuar mbi 150 alarme të rrejshme.
Për të pasur të njëjtin rezultat, Shala ka thënë se duhet të shtohen kapacitetet në sektorin e hetimeve të krimeve kibernetike.
“Duhet sa më shpejt që të jetë e mundur që Prokuroria të dalë me një raport zyrtar, së paku si në Serbi, ku janë lokalizuar shtetet prej nga janë dërguar e-mailet në drejtim të institucioneve për bomba”, ka thënë Shala.
Për alarmet e rreme, Prokuroria Themelore në Prishtinë ka hapur rast për veprën penale “kallëzim i rremë”.
Zëdhënësja e Prokurorisë, Laureta Ulaj, ka thënë se me rastin po merren Krimet Kibernetike. “Prokurori i Shtetit në koordinim të plotë me Njësinë e Hetimit të Krimeve Kibernetike në Policinë e Kosovës, janë duke i ndërmarrë veprimet hetimore me qëllim të sqarimit të të gjitha rrethanave të këtyre dy informatave anonime, si dhe identifikimit të personave të cilët kanë mundur ta kryejnë këtë vepër penale”, thuhet në përgjigjen e dhënë për KOHËN.
Në fund të vitit 2021, si dhe në fillim të vitit 2022, në Kosovë pati 5 paralajmërime të rreme për bombë në Stacionin e Autobusëve në Prishtinë. Shala ka thënë se këto ngjarje duhet të hetohen nëse kanë ndërlidhshmëri.
"Në Stacionin e Autobusëve kemi pasur 5 paralajmërime të rrejshme të kërcënimit me bombë, edhe në rajon. Kjo po tregon që një luftë hibride e cila po ndodh tani për tani, dhe një aktivizim i luftës hibride, duhet të analizohet se kush qëndron mbrapa kësaj lufte, kush e ka për qëllim të krijojë një panik, një pasiguri te qytetarët e Republikës së Kosovës", shtoi ai.
Edhe në Kroaci u raportua për një kërcënim për mjet shpërthyes në një qendër tregtare në Zagreb më 18 maj, por doli të ishte i rremë. Gjithashtu edhe në Bosnjë-Hercegovinë gjatë muajit shkurt pati kërcënime për bombë në një institucion të drejtësisë, i cili po ashtu doli të ishte alarm i rremë.
