Latifi shpalos para amerikanëve “planin për transformimin e shëndetësisë në Kosovë”
Shtatë muaj pasi mori drejtimin e Ministrisë së Shëndetësisë, Rifat Latifi vazhdon të prezantojë plane për “transformimin e shëndetësisë” në Kosovë. Një gjë të tillë, Latifi e bëri në New York të shtunën në vendin ku ai ishte kryeshef i Departamentit të Kirurgjisë para se të bëhej ministër.
Në konferencë e 19-të vjetore “Louis R.M. Del Guercio”, Latifi prezantoi “zbutjen e pabarazisë shëndetësore dhe transformimin e shëndetësisë së Kosovës”. Gjatë prezantimit, Latifi foli për sfidat që po e presin Kosovën si vend në tranzicion për rindërtimin e sistemit të shëndetësisë.
“Rindërtimi i shëndetësisë së Kosovës duhet të bëhet në bazë të dhënave shkencore dhe kërkesave klinike si dhe në bazë të gjetjeve studimore, analizave të shumta të bëra nga agjenci të ndryshme studimi, përfshirës edhe ato ndërkombëtare”, ka thënë Latifi para të pranishmëve, sipas njoftimit të MSH-së.
Latifi do të zhvillojë edhe disa takime të tjera në SHBA, që MSH-ja i cilëson si “takime të bëra me qëllim të kërkimit të bashkëpunimit për implementim e Qendrave të Ekselencës, të parapara me programin gjithëpërfshirës të transformimit të sistemit shëndetësor të Kosovës”.
Latifi u emërua si ministër i Shëndetësisë në nëntor të 2021-s.
