Pagesa prej 44 milionë eurosh shtesë për konserciumin Bechtel Enka është e bazuar në kontratë të jashtëligjshme. Nënshkrues të kësaj kontrate janë ish-ministri, Pal Lekaj dhe dy zyrtarë të administratës të atëhershme të Ministrisë së Infrastrukturës. Por, asnjëri prej tyre nuk është zyrtar përgjegjës i prokurimit. E Ligji i Prokurimit Publik e cilëson të jashtëligjshme çdo kontratë që nuk nënshkruhet nga zyrtari i prokurimit

Pagesa rreth 44 milionë euro që i është dhënë konsorciumit “Bechtel Enka” në emër të punëve shtesë për ndërtimin e autostradës “Arbën Xhaferi”, është bazuar në një kontratë të jashtëligjshme.

Aneksi të cilin e ka siguruar KOHA, ka vetëm dy faqe. Në fund të së dytës ndodhen tri nënshkrime të zyrtarëve që kanë vulosur këtë pagesë. Në bazë të pozitave të asaj kohe, nënshkrues ishin Pal Lekaj si ministër, Betim Reçica si sekretar i përgjithshëm, si dhe Ramë Qupeva, zyrtar si pjesë e Njësisë Implementuese të projektit.

Ndonëse kontrata bazë e ndërtimit të kësaj autostrade është bërë bazuar në Ligjin e Prokurimit Publik, aneksi është në kundërshtim të plotë me të.

Asnjëri nga zyrtarët nënshkrues për kosto shtesë prej 44 milionë eurosh nuk është përgjegjës i prokurimit. E ligji thotë në mënyrë të prerë që nëse kontrata nuk nënshkruhet nga zyrtari i prokurimit, ajo është e pazbatueshme dhe e paligjshme.

“Zyrtari përgjegjës i prokurimit i një autoriteti kontraktues është i vetmi person i autorizuar që të lidhë ose të nënshkruajë një kontratë publike në emër të autoritetit të tillë kontraktues. Nënshkrimi dokumenton se kontrata është dhënë në pajtueshmëri me ligjin aktual”, thuhet në paragrafin 1 të nenit 26 të këtij ligji.

E nëse mungon firma e zyrtarit të prokurimit, atëherë sipas ligjit një kontratë e tillë nuk zbatohet, ani pse në këtë rast tashmë paratë janë paguar.

KOHA për këtë çështje e ka kontaktuar edhe Komisionin Rregullativ të Prokurimit Publik. Në parim kanë thënë se çdo kontratë pa nënshkrim të zyrtarit të prokurimit është e pavlefshme ose NUL, por që në rastin konkret do të japin opinion ditëve në vijim.

Prokuroria e Shtetit nuk ka treguar nëse ka nisur ose jo hetimet për këtë aneks-kontratë.

“Bazuar në legjislacionin në fuqi për zhvillimin e procedurës penale, dhe në interesin më të mirë të drejtësisë dhe zhvillimin e procedurës penale, Prokuroria Speciale e Republikës së Kosovës (PSRK), rezervohet nga përgjigjet apo për dhënien e informatave për rastin i cili është apo mund të jetë në cilëndo fazë të hetimeve”, thuhet në përgjigjen e Prokurorisë.

Televizioni nga burime brenda Ministrisë së Infrastrukturës ka konfirmuar që hetuesia kurrë nuk ka kërkuar dokumente në lidhje me pagesën e 44 milionë eurove.

Ka ndodhur kështu, ndonëse organi i akuzës ishte në dijeni për të. Në hetimin e aferës së pagesës së 53 milionëshit, dëshmitari Ramë Qupeva e kishte pranuar që kjo kontratë nuk është nënshkruar nga zyrtari i prokurimit.

Zyrtarit të prokurimit i ishte kërkuar disa herë ta nënshkruante këtë aneks, por ai kishte refuzuar. Kjo nën arsyetimin se si çështje i takonte njësisë dhe jo divizionit ku ajo udhëheqte.

KOHA ka raportuar për këtë pagesë, e zëvendësministrit i Infrastrukturës, Hysen Durmishi ka deklaruar që për të e ka kuptuar nga raportimi. Ai ka ngritur dyshimet për ligjshmërinë e kësaj pagese ndërsa ka kërkuar nga Prokuroria e Shtetit që ta hetojnë rastin.

“Tani jemi njoftuar po ashtu nga mediat që është bërë edhe një pagesë tjetër, një aneks-kontratë për punë shtesë prej 44 milionë eurove. Kontrata me ‘Bechtelin’ ka qenë kontratë me çelësa në dorë dhe kontrata të tilla nuk lejojnë punë shtesë. Është pak e çuditshme dhe besoj që është punë për prokurorinë që ta hetojnë dhe ta zbardhin në tërësi të vërtetën”, ka thënë Durmishi.

KOHA ka provuar të kontaktojë edhe të martën dëshmitarin dhe nënshkruesin e kësaj kontrate Ramë Qupeva, ish-ministrin, Pal Lekaj dhe ish-sekretarin Betim Reçica, por dy të parët nuk janë përgjigjur ose e i treti ka qenë i paqasshëm.