5 perditesime
21:06

Çeku: S’është e nevojshme të ketë ndryshime sa herë ndërrohen ministrat

Gazetari i KOHËS, Shaban Maxharraj, thotë se qeveria po i futë duar në treg të artit duke blerë vepra të artit.

Këtij konkludimi i është përgjigjur Ministri i Kulturës, Hajrullah Çeku, i cili thotë se nuk është “futje e duarve”, por ndodhë për qëllim që të pasurohet koleksioni i artit të shtetit duke blerë vepra nga artistët pamorë.

“Nuk e di nëse është për t’i futur duart, edhe në thirrjen e kaluar dhe më tutje kemi bërë dhe do ta bëjmë bashkëpunim me Galerinë Kombëtare të Kosovës dhe nuk jemi të huaj nga sektori. Mund të bëhet nga Galkeria, më tepër është çështje e procedurave se kush po e zhvillon, synmi është të pasurojmë koleksionin e artit të shtetit nuk është futje e duarve është mundësi për të krijuar hapësirë financiare për të blerë vepra nga artistët pamorë”, ka thënë ai.

Çeku më tej në Desku të KTV-së u pyet në lidhje me çkapjen e shtetit, ku tha se nga ardhja e tij në pozitën e kreut të këtij dikasteri, deri më tani nuk është ndërruar asnjë bord, përveç atij të Teatrit Kombëtar të Kosovës, për shkak se kanë qenë jobashkëpunues dhe problematik në disa çështje.

Ai më tej thotë se nuk është e nevojshme që të bëhen ndryshime sa herë që ndërrohen ministrat.

“Është vetëm një këshill drejtues që është ndërruar nga momenti kur kam marrë detyrën dhe këtë jam detyruar ta bëjë për shkak se nuk ka qenë bashkëpunues dhe mjaft problematik në disa çështje. Asnjë bord tjetër nuk e kemi ndërruar, besojmë në idenë e vazhdimësisë, nuk ka kuptim që sa herë të vijë një ministër, të bjerë njerëz të tjerë. Përderisa këshillat performojnë nuk besoj se ka nevojë për ndryshime, pra jo vetëm se ka ardhur një ministër i ri të ndërrohen edhe këshillat”.


Çeku: Në mars TKK-ja do të mbyllet për renovim

Ministri i Kulturës, Rinisë dhe Sportit, Hajrullah Çeku, ka deklaruar se Teatri Kombëtar i Kosovës (TKK) do të rinovohet, me ç’rast do të mbyllet nga marsi për disa muaj. Ai deklaroi se në afërsi të këtij objekti do të bëhet teatri i ri, duke ndërhyrë në teatrin aktual.

“Te kultura i kemi katër projekte kapitale: salla koncertale, muzeu i artit bashkkohor, teatri i operës e baletit dhe teatri i ri kombëtar. Salla koncertale lokacionin do ta ketë te objekti i Gërmisë, muzeu te ‘Tulltorja’, po e trajtojmë të Manifesti”, deklaroi tutje ai.

20:42

Neziraj: Armiku më madh i kulturës është burokracia

Dramaturgu Jeton Neziraj, thotë se problemi kryesor në fushën e kulturës është byrokracia e shtetit.

I ftuar në Desku të KTV-së, Neziraj e cilësoi byrokracinë e shtetit si armikun më të madh të kulturës.

“Strumbullari i problemeve është byrokracia, nëse ekzistojnë mekanizma qoftë përmes amendamenteve të ligjeve që i shkarkojnë institucionet e kulturës, për t’i liruar prej byrokracisë së shtetit sepse problemi më i madh është byrokracia shtetërore. Nëse i marrim në fund të ditës, problemi del te byrokracia e shtetit, pra ky është armiku i kulturës”, ka thënë ai.


Neziraj: Në Ministri të Kulturës, bashkëpunime mes politikës e mafias kulturore

Ka pasur një bashkëpunim korruptiv të heshtur mes politikës dhe mafisë së ashtuquajtur kulturore, ka thënë dramaturgu, Jeton Neziraj në “DESKU” të KTV-së.

Teksa ka folur për thirrjet e Ministrisë së Kulturës për fonde, Neziraj ka thënë se në listën e përfituesve shpesh ka parë përfitues anonim prej vendeve të ndryshme.

“Nëse ka një thirrje të Ministrisë së Kulturës për fonde, dhe në listën përfituese sheh organizata joqeveritare ose përfitues anonim prej vendeve të ndryshme, të cilët përfitojnë shuma më të mëdha sesa operatorë kulturorë që janë aktivë dhe janë publikë dhe janë kompetentë në sferën ku punojnë, pra kjo automatikisht lë hapësira për dyshim dhe për të dyshuar se aty ka pasur skema korruptive. Pra ka qenë një lloj bashkëpunimi korruptiv i heshtur mes politikës, partive politike, zyrtarëve të Ministrisë së Kulturës, të cilët e kanë qeverisur atë dhe mafisë të ashtuquajtur kulturore, e cila është bërë kulturore vetëm në moment in kur është dashur ta marrin një tender në Ministrinë e Kulturës”, ka thënë Neziraj.

Sipas tij, problemi i skenës së pavarur kulturore ka qenë gjithmonë te mënyra se si është administruar buxheti për të.

20:39

Maxharraj: Ministria e Kulturës mbetet tek iniciativat

Gazetari i KOHËS, Shaban Maxharraj, ka deklaruar se qeverisja aktuale në Ministrinë e Kulturës, Rinisë dhe Sporteve, është në stad të iniciativave, duke potencuar se janë bërë vetëm disa hapa të vegjël.

Ai deklaroi në DESK-un e KTV-së se Ministria ende s’ka rekrutuar stafin që do i fillonte punët në kodet buxhetore.

“Një afat ka qenë prilli por sipas gjasave s’do të ketë në prill. Sa i përket kodeve buxhetore ende s’ka nisur rekruktimi i stafit që do t’i niste punët për pavarësimin e institucioneve”, deklaroi ai.

20:31

Çeku: Ky vit do të na gjejë me ligj të ri që përmbysë ekzistuesin dhe ambientin byrokratik

Ministri i Kulturës, Hajrullah Çeku, thotë se problemet në këtë fushë janë kronike dhe të shtresëzuara për të cilat nuk mund të ketë zgjidhje të shpejta.

I ftuar në Desku të KTV-së, Çeku tha se ligji ekzistues është i pamjaftueshëm dhe kufizues sa i përket kulturës, andaj janë duke punuar në një koncept-dokument ku po rishikojnë këtë ligj për ta ndryshuar atë dhe për t’i përmbysur ligjet ekzistuese dhe ambientin byrokratik, në të cilin që sipas tij, funksionojnë institucionet.

“Problemet janë kronike, janë të shtresëzuara dhe zgjidhjet nuk besoj se mund të jenë të shpejta për problemet që janë grumbulluar aty për vite të tëra. Lëvizjet që i kemi bërë dhe po vazhdojmë t’i bëjmë kanë të bëjnë me ndryshime strukturore. Ne besojmë që legjislacioni i kulturës jo vetëm se është i pamjaftueshëm, por shpesh është edhe kufizues. Me ato ligje që i kemi në sfera të ndryshme të kulturës ne hasim në shumë byrokraci në pengesa të tjera dhe ato nuk mundësojnë një ambient ku mund të zhvillohet veprimtaria artistike për këtë arsye e kemi nis hartimin e një koncept-dokumenti ku po e rishikojmë jo vetëm legjislacionin por edhe aktet e tjera që e rregullojnë funksionimin e institucioneve publike dhe ky vit do të jetë viti ku ne bashkërisht do t’i gjejmë formulat e sakta për të dalë nga kjo krizë dhe ato t’i kodifikojmë në ligjin unik të kulturës dhe një strategji kombëtare të kulturës. Unë nuk i besoj zgjidhjeve të shpejta për këtë arsye i kemi hyrë këtij procesi afatgjatë, por jo shumë afatgjatë sepse problemet janë aq të mëdha andaj ky vit do të na gjejë me ligj të ri që do të përmbysë këto ekzistueset dhe një ambient sa më pak byrokratik të funksionimit të institucioneve".

20:26

Neziraj: Problemet në kulturë janë ricikluar

Dramaturgu Jeton Neziraj, ka thënë se problemet në sferën e kulturës në Kosovë, nuk janë zgjidhur, por vetëm janë ricikluar.

Neziraj ka thënë në “DESKU” të KTV-së se ka progres në fusha të caktuara dhe regres për shumë vjet prapa në fusha të tjera.

“Është vështirë të shihen ndryshime të mëdha, po flasim për një periudhë pak më të gjatë dhe problemet janë aty, janë ricikluar, janë riformatizu, janë ndryshuar. E njëjta përshtypje ekziston sa i përket ligjeve, institucioneve, bordeve. Pra ka një progres në një fushë të caktuar dhe regres mandej në një institucion tjetër”, ka thënë Neziraj.

Sipas tij, është vështirë të flitet për ndryshime dhe se në këtë drejtim ka ndikuar edhe situata me pandeminë me COVID-19.

20:21

Çeku: Po punojmë që “Zgjoi” të nominohet për “Oscar”

Ministri i Kulturës, Rinisë dhe Sportit, Hajrullah Çeku, ka deklaruar se është duke u punuar shumë për çmimin “Oscar”, derisa tha se shpreson shumë në arritjen e çmimit.

Ai deklaroi në DESK-un e KOHËS se për “Oscar” përpos artit dhe cilësisë, nevojitet edhe lobimi, dhe se ndaj ekipit janë kryer dy “infuzione financiare” në betejën e tyre.

“Po punojmë shumë për Oscar. Është angazhim i madh, kemi shpresë, e kam kuptuar në këtë angazhim që është lobim përpos art e cilësi. Kemi shumë njerëz të angazhuar, po na jep shumë shpresë. I kemi kryer dy ‘infuzione financiare’ ndaj ekipit në betejën e tyre. Jemi shumë më afër pas 15-shit që është mbërritur tash”, deklaroi ai.

Çeku tha se kritika dhe shkrimet e huaja, përfshirë edhe vlerësimit, e bëjnë Zgjoin film shpresëdhënës për përfshirje në 5-shen.

“Komuniteti artistik është shumë më përpara sesa niveli ku institucionet janë. Duhet të bëjmë shumë ta mbyllim këtë lloj hapësire. Sukseset që i kemi mbërri janë rezultat i një pune vetmohuese të artistëve e filmbërësve”, tha tutje.

Çeku potencoi se sukseset e arritura vitin e kaluar shpreson të vijojnë edhe sivjet.