1 perditesime
23:20

Qeveria thotë se ka bërë përgatitjet e duhura në rast se mbahet referendumi ilegalisht

Zëdhënësi i Qeverisë, Përparim Kryeziu, ka thënë se institucionet tona kanë bërë përgatitjet e duhura në rast se të dielën do të mbahet referendumi i Serbisë brenda territorit të Kosovës.

Megjithatë, Kryeziu thotë se ajo është një situatë hipotetike, dhe deri tani, sipas tij, nuk ka ndonjë indikacion se do të ndodhë një gjë të tillë.

“Padyshim që qëndrimet tona përkthehen në veprime tona. Nuk ka dyshim sa i përket kësaj çështje. Nuk dua të paragjykoj asnjë sjellje të qytetarëve tanë të komunitetit pakicë serb. Ne kemi ofruar alternativat se si ata mund të jenë pjesë e këtij procesi. Nuk jam i njoftuar deri tani nëse ka ndonjë indikacion që referendumi do të mbahet në pjesën veriore apo në qytetet tjera me serbë. Janë bërë përgatitjet e përshtatshme për të zbatuar këtë vendim”, ka thënë Kryeziu në “Interaktiv” të KTV-së.

Kryeziu ka thënë se pret që të gjitha partitë opozitare të marrin pjesë në seancën e jashtëzakonshme. Ftesën për këtë seancë ai e ka ndërlidhur me shprehjen e vullnetit politik në vend përmes një rezolute.

Ai po ashtu ka kërkuar që jo çdo çështje që lidhet në raport me Serbinë të lidhet edhe me dialogun në mes dy shteteve.

Kryeziu ka thënë se Qeveria e Kosovës e konsideron lajm shumë pozitiv përafrimin e Shteteve të Bashkuara të Amerikës në dialog, ndërsa ka theksuar se qëndrimi i Qeverisë për refuzim të Asociacionit njëetnik të komunave me shumicë serbe nuk do të ndryshojë.

Ai ka përsëritur që Kosova e sheh të mundur arritjen e marrëveshjes finale me Serbinë gjatë mandatit të presidentit amerikan, Joe Biden.

23:10

Qeveria jep tri argumente pse është kundër referendumit të Serbisë në Kosovë

Tri argumente i ka përmendur zëdhënësi i Qeverisë së Kosovës, Përparim Kryeziu, se pse institucionet e Kosovës janë kundër organizimit të referendumit të Kushtetutës Serbe, brenda territorit të Kosovës.

Në Interaktiv të KTV-së, Kryeziu ka përsëritur qëndrimin e prerë të Qeverisë kundër këtij referendumi. Ai ka thënë se argumentimi është bërë edhe në mbledhjen e së premtes që tre krerët e shtetit patën me përfaqësuesit e shteteve të QUINT-it dhe Bashkimit Evropian.

Për argument të parë ai ka thënë se Serbia me këtë kërkesë për të mbajtur referendum kushtetues po mundohet të shtrijë sovranitetin brenda territorit të Kosovës. “Kjo s’ka të bëjë fare me përfshirjen e qytetarëve serbë të Kosovës, por më shumë shtrirje të Kushtetutës mbi Kosovën. Mbështesim këtë në faktin se s’po synohet të organizohet referendumi në asnjë shtet tjetër fqinj të Serbisë, ku ka serbë”, ka thënë ai.

Si argument të dytë, Kryeziu ka thënë se Serbia me referendum po mundohet t’i riaktivizojë strukturat ilegale. “E dimë se ato tashmë do të duhej të ishin shuar në bazë të marrëveshjeve të dakorduara në dialog. Për rolin e OSBE-së në këtë mes e dimë se është goxha i kufizuar. Reduktohet vetëm në grumbullimin e fletëvotimeve. Të gjithë organizimin tjetër logjistik do ta kishte bërë struktura ilegale. Prandaj nëse i themi po referendumit, u themi po strukturave ilegale”, ka vazhduar Kryeziu.

Zëdhënësi i Qeverisë ka thënë se si argument të tretë Qeveria e përmend që mbështetja në kërkesën e Serbisë që të organizojë referendumin duke u bazuar në praktikat e mëhershme nuk e plotëson domosdoshmërinë për ta realizuar. Ai ka thënë se Kosova ia ka ofruar praktikat e reja dhe demokratike Serbisë, që qytetarët me dy shtetësi të votojnë me postë apo nëpërmjet zyrës ndërlidhëse.