Në shumë zona të Kosovës, ndërprerjet e energjisë elektrike e tejkalojnë planin e reduktimeve 8 me 2.
Për ndërprerjet e stërzgjatura, qytetarët janë ankuar në Ministrinë e Ekonomisë, të cilët po dyshojnë se arsyetimet me problemet teknike nuk janë shkaku pse KEDS-i po ua ndërpret rrymën deri në 20 orë në ditë e pa kurrfarë orari.
Për dyshimet ndaj KEDS-it, në një postim në “Facebook”, ministrja e Ekonomisë, Artane Rizvanolli, ka paralajmëruar se është duke e përgatitur një dosje me të gjitha raportimet për t’ia dërguar Policisë së Kosovës për hetim.
“Ndër të tjera, në këtë dosje janë të përfshira edhe disa foto të cilat janë dërguar nga qytetarë ku vërehet heqja e disa siguresa nga trafot e rrymës, si dhe dyshimet nga ana e qytetarëve në lidhje me heqjen e qëllimshme të një faze në disa vende duke e zvogëluar ngarkesën e rrjedhimisht duke e bërë ngrohjen në disa vende jofunksionale. Nga Inspektorati i Energjisë kam kërkuar të kenë vigjilencë dhe angazhim të shtuar për të monitoruar situatën”, ka thënë Rizvanolli.
Rizvanolli ka thënë se bashkë me Inspektoratin do t’i ndjekin të gjitha rrugët ligjore për t’i sjellë para ligjit ata që po e shfrytëzojnë krizën energjetike.
Për reduktimet, në një konferencë për media, drejtori i sistemit të operimit në KEDS, Bujar Jupaj, pavarësisht situatës në terren, tha se e kanë zbatuar në përpikëri planifikimin 8 me 2. E për rastet kur nuk ka ndodhur kështu, ai ka dhënë një arsye.
“Ndërprerjet kanë ndodhur sipas kërkesave, në bazë të ngarkesave. Problem gjatë realizimit të planit si KEDS kemi pasur shumë probleme në rikthimin e energjisë si pasojë e ngarkesës së madhe, çka do të thotë se pas ndërprerjes së planifikimit me fillimin e aktivizimit të daljeve ka qenë një mori e problemeve si pasojë e mbingarkesave ku kemi pasur dëme, djegie të stabilimenteve elektroenergjetike. Mirëpo, përkundër këtij plani, KEDS-i ka angazhuar 400 punëtorë që të rikthejë energjinë sa më shpejt”, ka deklaruar Jupaj.
Në këtë konferencë për media, deklarimeve të ministres i është kundërpërgjigjur zëdhënësi i KEDS-it, Viktor Buzhala.
“Është koha kur duhet të bëhemi të gjithë bashkë dhe të gjejmë zgjidhje. Nuk është koha e akuzave. Qëllimi ynë është që të kalohet sa më lehtë kjo situatë”, ka thënë ai.
Të shtunën, edhe kryetari i Partisë Socialdemokrate, Dardan Molliqaj, akuzoi KEDS-in se po e shet rrymën natën.
“Në Kosovë gjatë natës, ku sipas të gjitha gjasave ka më shumë prodhim sesa konsum, KEDS-i është duke shitur energji në vendet e tjera. Kërkojmë menjëherë të deklarohen se cila dhe sa sasi është shitur, me çfarë çmimi dhe në cilat orë e në cilat vende. Sipas atyre që kemi informata përgjatë mesnatës, në bllokun A2 diku 85 deri 95 megavat janë duke u prodhuar më shumë, sesa ka nevojë në Kosovë, kurse 130 deri 140 në bllokun B”, ka deklaruar Molliqaj.
Por me këto akuza, Viktor Buzhala tha se është duke u marrë zyra ligjore e KEDS-it.
Për krizën energjetike, të hënën, është paralajmëruar protestë para KEDS-it ku përveç furnizimit me energji 24/7 do të kërkohet edhe shkarkimi i ministres Rizvanolli.
“KEDS-i po vazhdon të fitojë në kurriz të qytetarëve të Kosovës. E gjithë Qeveria është vënë në shërbim të ruajtjes dhe mbrojtjes së kësaj kompanie që nga ndarja e 20 milionë eurove të parasë publike për këto kompani private e deri te konferenca qesharake e ministres Rizvanolli, ne jemi vënë në shërbim të kësaj kompanie, sikur t’ia kishim borxh mirëqenien e saj”, është shprehur Dibran Hoxha, përfaqësues i protestës.
Nga KEDS-i kanë thënë se nga dje ka përmirësim të madh të situatës energjetike pasi që janë rritur temperaturat dhe kanë rënë çmimet e energjisë në tregjet ndërkombëtare.
© KOHA. Të gjitha të drejtat janë të rezervuara.
