Deputeti i Lëvizjes Vetëvendosje, Mefail Bajqinovci, thotë se kompania për shpërndarjen e rrymës KEDS, po diskriminon disa lagje të Prishtinës.
Sipas tij, kjo po bëhet pasi në disa pjesë të kryeqytetit nuk ka rrymë deri në gjashtë orë, kurse në disa pjesë të tjera nuk ndalet fare, përkundër se vendi po përballet me reduktime të shpeshta si pasojë e krizës energjetike.
“Në disa lagje rryma ndalet deri në 6 orë në ditë, ndërsa kemi lagje ku energjia nuk ndalet fare. KEDS nuk guxon t’i privilegjoj lagjet e caktuara me energji elektrike, ndërsa lagjet në periferi t’i diskriminojë duke i lënë në terr me orë të tëra”, ka shkruar Bajqinovci.
Për këtë që ka folur sot deputeti i Vetëvendosjes, qytetarë të shumtë të Prishtinës, sidomos nga lagjja Velania, i kanë shkruar KOHËS në mëngjesin e sotëm se “tash e 14 orë nuk kanë rrymë”.
Ankesa të shumta të këtij lloji nga qytetarët u bënë edhe nëpër publikimeve në rrjete sociale.
“Kjo situatë tregon se politika e djathtë, sipas të cilës privatizimi zgjidh problemet me shërbime publike,- është e keqe. Kesco dhe Keds duhet të nacionalizohen. Kur ka fitim - e ndajmë, kur ka humbje - e ndajmë, e jo kështu fitimi i tyre e humbja e jona, edhe shërbimi katastrofik. Futemi në orën e 14-të pa rrymë”, ka shkruar në Facebook qytetari V.G. me vendbanim në Velani, rreth orës 9:30.
Ndërkaq, në disa lagje të Prishtinës është aplikuar orari 4 orë me rrymë e 2 pa rrymë. Kështu janë njoftuar edhe banorët e fshatit Peqan në Suharekë, por po u ndalet rryma nga 3 orë. Banori F.G. i ka shkruar KOHËS se ndërprerjet janë 3 me 3.
Së fundmi, KEDS-i ka njoftuar se reduktimet e energjisë elektrike do të vazhdojnë edhe në ditët në vijim.
© KOHA. Të gjitha të drejtat janë të rezervuara.
