1 perditesime
22:40

Sveçla: Sot u legjitimua lufta jonë ndaj grupeve kriminale

Ministri i Punëve të Brendshme, Xhelal Sveçla, ka thënë se me vendimin e SHBA-së për sanksionimin e Zvonko Veselinoviqit, u legjitimua lufta e Qeverisë së Kosovës ndaj grupeve kriminale të krimit të organizuar në veri.

“Nga aksioni i fundit i Policisë së Kosovës në 4 rajone të Kosovës me qëllim të goditjes së kontrabandës, në veri të Kosovës kishte rezistencë ndaj këtij aksioni me ç'rast mbetën të lënduar disa zyrtar policor e dëme të mëdha materiale. Sot u legjitimua lufta jonë ndaj grupeve kriminale e krimit të organizuar, specifikisht në veri, ku struktura të caktuara kanë rezistuar saherë kanë qenë cak i shkatërrimit”, ka shkruar Sveçla në Facebook.

Ai ka thënë se mbesin të pakompromis në luftimin e krimit, kontrabandës e korrupsionit që cenojnë rendin dhe sigurinë kudo në Kosovë.

20:53

Haxhiu: Sanksionimi i grupeve kriminale në veri, lajm jashtëzakonisht i mirë

Ministrja e Drejtësisë, Albulena Haxhiu, e ka quajtur lajm të mirë sanksionimin nga SHBA-ja të grupeve të krimit të organizuar në veri, me në krye Zvonko Veselinoviq e Milan Radojçiq.

Haxhiu ka thënë se grupe të tilla kriminale nuk e kanë pasur vetëm mbështetjen e Beogradit, por edhe të Prishtinës.

“Lajm jashtëzakonisht i mirë saksionimi i grupeve të krimit të organizuar në veri të udhëhequr nga Zvonko Veselinoviq dhe Milan Radojçiq. E kemi theksuar që moti se veriu është i tillë jo për shkak të banorëve, por sepse është kontrolluar nga grupe të tilla kriminale që nuk kanë pasur vetëm mbështetjen e Beogradit, por edhe të Prishtinës. Këto grupe kriminale, që hera herës priteshin edhe në zyret e institucioneve tona më te larta, fshihen prapa rezistencës që i bëjnë organeve të rendit për të sjell rend e ligj në atë pjesë të Republikës. Republika e Kosovës është e përcaktuar qartë në luftimin e kriminalitetit në çdo cep te saj, ndërkaq sanksionet e ShBA-ve mbi këto grupe kriminale tregojnë qartë adresat konkrete të vatrave të kriminalitetit që terrorizojnë qytetarët e asaj ane”, ka shkruar Haxhiu në Facebook.