Fazliu: Duhet kujdes kur flasim për Asociacionin, sepse nuk po flasim për një OJQ

Eraldin Fazliu, redaktor në Grupin KOHA, ka thënë se Qeveria dhe kryeministri Albin Kurti nuk kanë dhënë alternativa për atë se si e shohin Asociacionin e komunave me shumicë serbe. Ai ka thënë se Qeveria për këtë çështje nuk po jep shumë të dhëna, pavarësisht deklaratave që kanë dhënë kur nuk Vetëvendosje nuk ishte në pushtet.

“Në këta nëntë muaj qeverisje, VV dhe kryeministri Kurtio nuk është se është dakorduar apo nuk ka dhënë ndonjë alternativë se çfarë ose nuk ka dhënë ndonjë alternativë se çfarë nëse jo me kompetenca ekzekutive, a ka alternativë tjetër apo duhet të hedhet tërësisht ajo si marrëveshja”.

Deskun e KOHËS, Fazliu ka thënë se Kurti gjendet mes dy “zjarresh” – premtimeve që kishte dhënë si opozitë.

“Kurti është i gjendur mes dy zjarreve tash, mes asaj që ka premtuar në tërësi dhe ka ndërtuar një kauzë e qëndrim që nuk don ta zbatojë një marrëveshje që do të bënte bosnjëzimin. Të rrezikshme e shoh se si edhe një kundërshtim ndaj shefit të diplomacisë, këtu ngrihet alarm sikur përfundoi gjithçka. Jo nuk përfundon”.

Sipas Fazliut duhet pasur kujdes në qasjen ndaj Asociacionit.

“Kur flasim për asociacionin dhe një kushtëzim nga ana e Serbisë duhet të kemi kujdes sepse nuk po flasim për një OJQ, po flasim për një kërkesë të thjeshtë që Serbia e ka pasur në vazhdimësi që ta ruajë fuqinë e vetë që ta kontrollojë Kosovën përmes këtij asociacioni. Është e rrezikshme të ngritën flamuj që po kërkoj BE-ja dhe ne po heqim dorë edhe nëse e dëmtojmë sovranitetin e vendit”, ka përfunduar Fazliu.

Emir Abrashi, hulumtues në Demokracia Plus, ka thënë se nuk pret që Serbia do të stepet nga kërkesa që Kosova ta formojë Asocacionin, si pjesë e marrëveshjes së vitit 2013 në dialogun Kosovë-Serbi.

Abrashi ka thënë se zërat për formimin e Asociacionit në këtë kohë nga Serbia janë shtuar për shkak të zgjedhjeve të vitit të ardhshëm në Serbi.

“Në kohë fushatash, palët zakonisht, rëndomë i ngrisin tonet nacionaliste e populiste dhe rrjedhimisht i tregojnë edhe dhëmbët më shumë karshi palëve të tjera. Në këtë rast, nuk pres që pala serbe të stepet nga qëndrimi për ta futur në agjendë çështjen e Asociacionit dhe rrjedhimisht nuk pres që të ketë ndonjë lëvizje në procesin e dialogut në Bruksel. Pas përfundimit të ciklit zgjedhor në Serbi, do të ulen pak gjakrat, do të ftohen palët dhe ndoshta do të jetë më i përafërt një përafrim i qëndrimit të palëve”, ka thënë Abrashi në "DESKU" të KTV-së.

Sipas tij, formimi i Asociacionit nuk ka alternativë.

“Që Asociacioni duhet të formohet, unë mendoj se kjo nuk ka alternativë. Është një marrëveshje që Republika e Kosovës e ka nënshkruar në vitin 2013, është amandamentuar në vitin 2015, amandamenti i 2015-tës parasheh edhe marrjen e mendimit të Kushtetueses para formimit të Asociacionit. Ne e kemi marrë një mendim të Kushtetueses për këtë çështje, disa prej parimeve është parë se nuk janë në përputhje me Kushtetutën e Republikës së Kosovës dhe normalisht që tash duhet të punojmë rreth hapit tjetër, megjithatë unë nuk pres që Serbia të stepet nga ky qëndrim e as që BE-ja të lëshojë pe në këtë çështje”, është shprehur Abrashi.

Abrashi ka thënë se Kosova nuk ka sit ë tërhiqet nga marrëveshja për Asociacionin, pa koordinim me aleatë.

“Nga 31 gushti jemi pa ambasadorë në shumicën e vendeve, që janë vende mike që na kanë përkrahur. I kemi shumicën e misioneve pa ambasadorë, dhe e kemi diplomacinë serbe që është e angazhuar në shtyrjen para të interesave të Serbisë”.

Besnik Vasolli, ekspert për integrime evropiane, ka thënë se pajtimi për Asociacionin e komunave me shumicë serbe është i vështirë marrë parasysh edhe vendimin e Gjykatës Kushtetuese.

Ai në Deskun e KOHËS ka thënë se Asociacioni sipas marrëveshjes së vitit 2015 është rrezik për stabilitetin në vend.

“E kemi të qartë çka kërkohet prej asociacionit, nuk kërkohet asociacion i komunave serbe sepse edhe emri është gabim. Nuk do duhej të diskutohet në aspektin e asociacionit si të komunave të përgjithshme por qeveria serbe kërkon që asociacioni të bëhet sipas marrëveshjes së 2015-s dhe ajo marrëveshje me kompetenca ekzekutive do të ishte rrezik, kancer për stabilitetin dhe mirëqenien e vendit tonë dhe ndoshta ndikim në aspektin rajonal”.

Vasolli ka thënë se ka pritur që në takimin në Bruksel dje, të diskutohej edhe për projekte investive.

“Janë shumë kapituj të tjerë që meritonin diskutim më të thellë edhe nga BE, ku do shihnim se ku jemi me zbatimin. E kuptoj që dialogu ka rëndësi edhe për BE-në dhe rajonin që të tejkalojmë konfliktin e ngrirë dhe të na shpejtohet rruga drejt BE-së, por në këto takime mes Kosovës dhe BE-së do prisja të ketë fokusim më shumë në projekte të mëdha investive që mund të sillnin dobi ekonomike”, ka thënë ai.

Vasolli thotë se as Kosova e as Serbia nuk janë afër integrimit në BE.

Deputetja e Lëvizjes Vetëvendosje, Arbëresha Kryeziu-Hyseni, ka thënë se Qeveria Kurti nuk diskuton me Serbinë për Asociacion njëetnik, pasi Kosova është shtet multietnik.

Kryeziu-Hyseni ka thënë në “DESKU” të KTV-së se ndonëse Qeveria Kurti nuk dëshiron të diskutojë me Serbinë për Asociacionin, Bashkimi Evropian po bën presion ndaj Kosovës për këtë.

“Pala kosovare ka treguar se nuk është e gatshme të flasë për temën e Asociacionit. Nuk është temë që ka prioritet diskutimi për Asociacionin një etnik, pasi qëndrimi i palës kosovare është bërë i ditur prej kur ky dialog ka filluar të udhëhiqet nga përfaqësuesit e Qeverisë Kurti. Nuk kemi pse të flasim për asociacion njëetnik, që është kërkesë e vazhdueshme e palës serbe, për të cilën po insiston që të futet në kuadër të agjendës së temave. Duket që tani kemi një tjetër përfaqësim të Kosovës, që shkon me parime të qarta, nuk duam të flasim për Asociacionin etnik dhe nuk duam të flasim për një gjë të tillë”, ka thënë Kryeziu-Hyseni.

Kryeministri Kurti e përfaqësuesi i Lartë i BE-së për Politikë të Jashtme, Josep Borell, janë përplasur të martën në Bruksel për Asociacionin.

Teksa kryeministri i Kosovës, Albin Kurti, ka thënë se Marrëveshja për Asociacionin e komunave me shumicë serbe nuk është në interes të serbëve të Kosovës dhe është servis i Beogradit zyrtar, Borrelli, ka kritikuar qasjen e Kosovës.

Në një përgjigje direkte, në konferencën e përbashkët për media, Borrell ka thënë se kjo marrëveshje duhet të implementohet sepse është nënshkruar nga të dyja palët.

© KOHA. Të gjitha të drejtat janë të rezervuara.