2 perditesime
11:42

Gucati dëshmon të hënën në Speciale, avokati i tij i quan të sajuara akuzat e ngritura nga ZPS-ja

Avokati i ish-kreut të OVL të UÇK-së, Hysni Gucatit, Jonathan Rees, ka thënë se Zyra e Prokurorit të Specializuar po i heton Hysni Gucatin dhe Nasim Haradinajn me akuza të sajuara. Ai këtë zyrë e ka quajtur frikacake, teksa shtoi se të hënën do të jetë paraqitja e Gucatit para trupit gjykues për t’u përgjigjur në pyetjet e tyre.

“ZPS-ja synon Hysni Gucatin dhe të bashkakuzuarin e tij me akuza të sajuara në një procedim pa viktima. Për mendimin tonë kjo është një procedim prej frikacaku nga një zyrë prokurorie frikacake. Përkundrazi, Hysni Gucati nuk është frikacak, ai është, ka qenë gjithnjë i hapur, i ndershëm dhe transparent dhe të hënën ai do të japë dëshmi dhe do t’i përgjigjet çdo pyetje që do t’i bëhet”, raporton KOHA.net.

Rees ka thënë se ZPS-ja nuk ka ofruar raportin se si një punonjës i saj është i implikuar në rrjedhjen e materialeve të cilat arritën para zyrave të OVL-së në Prishtinë. E kjo sipas avokatit, është për shkak se ZPS-ja nuk ka një raport të tillë dhe refuzon të dalë me një të tillë.

“Kur mbrojtja thotë ka informacion se një punonjës me emër që punon aktualisht në ZPS është implikuar në proces përmes të cilit materialet arritën në zyrat e OVL-së, ata nuk thonë asgjë dhe nuk kërkojnë asnjë provë për ta hedhur poshtë. Pavarësisht nga hetimet që prokurori i specializuar pretendon se kanë kryer, ZPS-ja nuk ka dhënë si provë ndonjë raport të pavarur që ta shfajësojë stafin e vet si të përfshirë në rrjedhjen e një dokumenti të tillë. Ata nuk mund ta bëjnë këtë sepse nuk e kanë një raport të tillë. Kur nuk ka vullnet apo prirje për ti përballur ata në shtyp që nxorën në dritë duke përdorur fjalën e tyre, bashkëpunimi i turpshëm të ZPS-së dhe atyre të dyshuar për krime më të rënda, ZPS-ja refuzon njëkohësisht të lejojë të vërtetën të dalë në shesh se kush dhe si e pse ky material doli nga zyrat e saj dhe përfundoi në OVL”, ka thënë Rees.

Shtoi se mbrojtja do të paraqesë prova që kanë të bëjnë me emra të cilëve ZPS-ja u ka kërkuar bashkëpunim.

Kush do të kërkojë drejtësi për masakrat në Kosovë, Rees përgjigjet: Jo ZPS-ja

Tutje ai kërkoi të shihen provat që janë dëgjuar deri më tash dhe i kanë marrë në kuadër të kësaj çështje që kanë të bëjnë rreth shqetësimeve që janë ndarë edhe nga të tjerët dhe janë botuar nga persona në internet dhe të cilat janë edhe sot në faqe interneti.

Ai tha se brenda të njëjtave prova materiale, kanë parë edhe një artikull në këtë rast, që kishte titullin “Ish-komandanti i Policisë së Gjakovës, Milan Stojanoviq, bashkëpunëtor i Dhomave të Specializuara”.

“Edhe pse ata zgjohen çdo ditë në panik në mënyrë që të dëgjojnë lajme për të dashurit e tyre, shkruan gazetari, ka kaluar mbi dy dekada dhe asnjë informacion nuk është dhënë rreth personave të zhdukur të Gjakovës. Megjithatë duket se ish-komandanti i policisë së Gjakovës gjatë regjimit të Millosheviqit është bashkëpunëtor i ngushtë i Dhomave të Specializuara pavarësisht faktit që ai është përgjegjës për masakrën e Mejës në Gjakovë”, lexoi avokati.

Ai tha se një gazetë kosovare ka marrë një dokument që konfirmon bashkëpunimin e Stojanoviqit me Dhomat e Specializuara.

“Kush do të kërkojë drejtësi për ata persona në Gjakovë që janë zhdukur nën rendin e Stojanoviqit, jo ZPS, e cila në vend se të bëjë këtë gjë, bashkëpunon në mënyrë që të ndjek agjendën e vet me persona të tillë”, tha ai.

Teksa pyeti edhe se kush do të kërkojë drejtësi për të vrarët në masakrën e Mejës.

“Kush do të kërkojë drejtësi për ata persona që janë vrarë në masakrën e Mejës nën komandën e Milan Stojanoviqit, jo ZPS, që në vend se ta bëjë këtë, bashkëpunon për të ndjekur agjendën e saj me persona të tillë”, ka shtuar ai.

Rees tha se panë provën materiale në video, me pamje, fotografi të varrezave në Mejë, po ashtu dëgjuan narracionin e datës 27 prill, që shënon ditën që 376 civil, përfshirë gra e fëmijë janë vrarë në Mejë , fëmijë e gra që u ekzekutuan dhe u dogjën në një shtëpi nga forcat serbe.

Në vijim, ai tha se panë edhe provën materiale P0125 dhe përkthimin e saj, ku ishte titulli “Skandaloze, Gjykata Speciale kërkon material kriminal për Adem Jasharin”.

“Gjykata Speciale i ka kërkuar zyrës serbe të prokurorisë materiale kriminale për Adem Jasharin, 17 vjet pas vdekjes së tij, botohet në gazetë. Në mars 1998 pas disa ditësh rezistence në Prekaz, komandanti Adem Jashari dhe 60 anëtarë të familjes së tij u vranë, sulmi i njësive të posaçme të Serbisë mbi familjen Jashari në Prekaz, çoi në vrasjen brutale të Adem dhe Hamëz Jasharit”, lexoi tutje Rees.

Ai citoi se masakra kundër familjes Jashari si shumë të tjera u krye nga forca policore, ku 21 vjet më vonë askush nuk ka mbajtur përgjegjësi.

“Edhe pse emrat e atyre që janë në zinxhirin e komandës janë të njohur duke filluar nga polici dhe presidenti Slobodan Millosheviq, nuk është bërë asnjë përpjekje nga drejtësia ndërkombëtare për të gjykuar kriminelët serbë dhe kërkuar drejtësi për vrasje të tilla barbare”, citoi Rees. “Kush do të gjejë drejtësi për ata 60 viktima të familjes Jashari, të vrarë në Prekaz, jo ZPS-ja e cila në vend se ta bëjë këtë, u drejtohet agjencive që janë qenë përgjegjëse për masakra që të bashkëpunojë me të për të ndjekur agjendën e vet”.

Tutje, tha se ndërmjet dokumenteve të rrjedhura ishte një letër ku kërkohej nga ish -prokurori për krime lufte i Serbisë që të jepte dokumente për Adem Jasharin.

11:24

Avokati i Gucatit: ZPS-ja nuk çau kokën që t’i merrte dokumentet, as t’i hiqte artikujt e botuar

Avokati i Hysni Gucatit, Jonathan Rees, ka thënë se Zyra e Prokurorit të Specializuar nuk ka treguar asnjë interes që dokumente të Gjykatës Speciale të cilat u bënë publike në disa media në Kosovë, të hiqeshin.

Ai ka thënë se pavarësisht se u bënë publike dhe pati versione të paredaktuara, ZPS-ja nuk u mundua që t’i hiqte.

“E vërteta është se ZPS-ja nuk çau kokën që t’i merrte, nuk tregoi asnjë interes për t’i marrë ato dokumente, pavarësisht nga artikulli i botuar në media. Duke e bërë ekzistencën e dokumenteve të qarta për t’i parë të gjithë Berisha dhe bashkëpunëtorë botuan kopje të dokumenteve në internet ku janë edhe sot, ndryshe nga ç’bëri Gucati. ZPS-ja nuk i kërkoi asnjëherë medias (Infokus) që t’i hiqte ata artikuj dhe nuk kanë treguar asnjë lloj interesi që të hiqen ata artikuj”, ka thënë ai.

Në paraqitjen e mbrojtjes për çështjen e Gucatit dhe Haradinajt në Hagë, Rees ka prezantuar provat e rrjedhjes së dokumenteve dhe publikimit të tyre më pas.

“Duke i kushtuar kohë fjalëve të thënë nga Gucati dhe i bashkakuzuari i tij se ZPS-ja, ai, Berisha (gazetar) kërkoi që t’i merrte dokumentet, donte t’i merrte të gjitha t’i shikonte në formën e plotë dhe të paredaktuar dhe i mori rreth 1000 faqe duke e bërë një shqyrtim në zyrat qendrore të OVL. Ai fizikisht i hoqi dokumentet nga zyra dhe i shpuri në zyrat e veta të gazetës ku si Gucati, ai i vuri dokumentet në dispozicion të gazetarëve të tjerë. Këto dokumente ua vuri në dispozicion katër personave pa ndonjë redaktim”, ka thënë Rees teksa tregoi për rastin kur pako dokumentesh liheshin te dera e OVL të UÇK-së në Prishtinë nga persona të panjohur.

10:48

Rees: ZPS-ja ndjek jo rrugën e dyerve të çdokujt që ka prova për kriminelë, por mandatin e vet

Mbrojtja e Hysni Gucatit dhe Nasim Haradinajt kanë paraqitur çështjen para trupit gjykues, për veprën për të cilën akuzohen - pengimin e personave zyrtarë në kryerjen e detyrave, frikësim të dëshmitarëve e shkelje të fshehtësisë së procedurës.

Avokati i Gucatit, Jonathan Elystan Rees, ka nisur mbrojtjen me prezantimin e Kosovës si shtet sovran dhe i pavarur, e që si i tillë duhet të veprojë dhe të respektohet e drejta e shprehjes së lirë.

Ai ka thënë se drejtësia duhet të ofrohet për të gjithë dhe jo vetëm për disa, teksa foli për punën e Gjykatës Speciale dhe kundërshtimin që ish-krerët e OVL të UÇK-së patën bërë ndaj saj.

“Sipas ligjit ky institucion është një institucion i Republikës së pavarur dhe sovrane të Kosovës, është e drejtë që populli i Kosovës të veprojë si i tillë. Republika moderne e Kosovës i cakton vlerën më të lartë lirisë së shprehjes dhe opinionit. Këto liri janë fituar nga brezi i Hysni Gucatit duke sakrifikuar jetën dhe gjakun e tyre. Krah njohjes së kësaj sakrifice, Republika e Kosovës kërkon që institucionet e veta të jenë të hapura dhe transparente, që rrezja e dritës të ndriçojë të gjitha cepat e organeve administrative dhe gjyqësore. Ligji për klasifikimin e informacioneve është i qartë, klasifikimi i informacionit si i kufizuar nuk duhet të përdoret si instrument për të fshehur shkeljet e ligjit, abuzimin me detyrën, mungesën e efikasitetit ose gabimin. Nuk duhet të përdoret për të parandaluar cenimin e një personi apo organizate”.

“Ne po kërkojmë që të kontrollojmë se çfarë bëhet nga puna e personave të dyshuar duke dhënë vetëm versione te censuruara për publikun. E tashmja dhe e ardhmja e Kosovës duhet të jetë realitet ku drejtësia ofrohet për të gjithë dhe jo vetëm për disa”, ka thënë ai.

Rees ka thënë se Gucati është shprehur sa i përket shqetësimeve lidhur me Gjykatën Speciale, porse sipas tij, fjalën e tij i janë kthyer kundër nga prokurori i specializuar i cili e ka etiketuar Gucatin si oponent të shprehjes ashpër kundër institucionit.

“Një shprehje që Gucati ka përdorur është që ZPS nuk ndjekë drejtësinë për të gjithë por vetëm për ca. Pretendimi i prokurorit të specializuar në deklaratën hapëse se kjo gjykatë duhet të jetë një që shtytet nga viktimat, cenohet nga veprimet e zyrës së vet e cila ndjek jo rrugën e dyerve të çdokujt që mund të kenë prova për kriminelë, por mandatin e vet. Është arrogante dhe e pasaktë në masa të barabarta për ZPS që të prezumojë që drejtimi që ka marrë për të ndjekur këtë agjendë është e njëjtë në të gjitha aspektet e mundshme”.