Osmani për 28 nëntorin: Kjo datë ka shumë peshë historike

Presidentja e Kosovës, Vjosa Osmani, ka uruar Shqipërinë për 109-vjetorin e pavarësisë së saj.

Osmani ka thënë se 28 nëntori ka shumë peshë historike, pasi përveç pavarësisë së Shqipërisë, në këtë ditë ka lindur edhe komandanti legjendar Adem Jashari dhe u paraqit për herë të parë publikisht Ushtria Çlirimtare e Kosovës.

“Më 28 nëntor të vitit 1912, populli shqiptar e kurorëzoi aspiratën për Shqipërinë e pavarur. Ky akt së bashku me ngritjen e flamurit në Vlorë janë akte të shenjta të historisë sonë të përbashkët, të cilën e ndërtuam me mund dhe sakrifica. Kjo datë ka shumë peshë historike. Në këtë ditë ka lindur komandanti legjendar Adem Jashari dhe po në këtë ditë, Ushtria Çlirimtare e Kosovës u paraqit për herë të parë publikisht. Të dy këto ngjarje i japin edhe më shumë kuptim nëntorit, sepse bartin në vete frymën e lirisë, idealin e brezave që nga Skënderbeu, Ismail Qemajli, Isa Boletini e shumë patriotë të tjerë. Në 109- vjetorin e pavarësisë, uroj që Shqipëria krahas Kosovës të ketë sukses në të gjitha fushat! Kosova do të vazhdojë të jetë në krah të Shqipërisë në të mirë të interesit të përbashkët, duke thelluar më tej lidhjet tona ndërmjet motrave e vëllezërve, sikurse edhe ato strategjike”, ka shkruar ajo në Facebook.