1 perditesime
23:12

Kryeprokurori shkon në Gllogjan, edhe pse tha që s’e sheh të arsyeshme të shkojë pa u sqaruar rrethanat

Kryeprokurori i Prokurorisë Speciale të Republikës së Kosovës, Blerim Isufaj, i kontaktuar nga “Betimi për Drejtësi” ka thënë se nuk kanë shkuar në Gllogjan të Deçanit, aty ku mbeten të vrarë tre persona dhe një i lënduar nga të shtënat me armë zjarri në drejtim të një autobusi.

Ai tha se do ta vlerësojnë situatën dhe me pas të vendosin nëse duhet ta marrin rastin apo jo.

‘‘Jo, jo nuk jemi ne në vendin e ngjarjes është Peja në vendin e ngjarjes, rasti është i rëndë u dashtë me dalë shpejt. E vlerësojmë varësisht prej situate, tash nuk mund të themi, tash është herët’’, ka thënë ai për ‘‘Betimi për Drejtësi’’.

Ndërsa, me Kodin Penal të Republikës së Kosovës, “Terrorizëm”, “Veprim terrorist” apo “Vepër terroriste”, nënkuptohet edhe kryerja e veprës penale të vrasjës së rëndë, me qëllim të frikësimit serioz të popullsisë, të detyrimit të padrejtë të një organi publik, qeverisë apo organizatës ndërkombëtare për të kryer ose për të mos kryer ndonjë veprim, apo që seriozisht të destabilizojë ose të shkatërrojë strukturat themelore politike, kushtetuese, ekonomike apo shoqërore të Republikës së Kosovës, të një shteti tjetër apo të një organizate ndërkombëtare.

Ndërsa, si kompetencë plotësuese e PSRK-së është edhe vrasja e rëndë dhe sipas Ligjit të PSRK-së në rastet kur është në interes të hetimit a ndjekjes së duhur të krimeve, PSRK-ja do të ushtrojë kompetencën e vet plotësuese.

Sipas pikës e) të nenit 10 të Ligjit të PSR-së është interes i hetimit nga ana e PSRK-së kur ekziston dyshimi i bazuar se PSRK-ja, për shkak të rrethanave të veçanta, ose të komplikimit, a të natyrës së sjelljes së supozuar kriminale, është organi i vetëm që mund të realizojë një hetim ose ndjekje tërësore të krimit.

Por, më pas, Kryeprokurori Isufaj ka dalë në vendin e ngjarjes dhe është prononcuar para medieve.

Ndryshe, në Gllogjan të Deçanit mbrëmjen e së premes ka pasur të shtëna armësh në drejtim të një autobusi, ku tre persona kanë vdekur dhe ka të lënduar.

I kontaktuar nga “Betimi për Drejtësi”, zëdhënësi i Prokurorisë Themelore në Pejë Shkodran Nikqi, ka thënë se nga ky rast i rëndë deri më tani kanë ndërruar jetë tre persona dhe një ka mbetur i plagosur, ndërsa sipas tij tani për tani është shumë herët për të dhënë detaje të tjera.

Lidhur me tragjedinë në Deçan kanë reaguar presidentja Vjosa Osmani, ministrja e Drejtësisë, Albulena Haxhiu, kryetari i Deçanit, Bashkim Ramosaj, e të tjerë.

21:33

Miftaraj çuditet pse rasti në Gllogjan nuk po hetohet nga Prokuroria Speciale

Ehat Miftaraj nga Insituti i Kosovës për Drejtësi është shprehur i habitur se si rasti i të vrarëve në Gllogjan nuk po hetohet ende nga Prokuroria Speciale.

Miftaraj përmes një shkrimi në Facebook thotë se nëse një gjë e tillë nuk ndodhë, atëherë “nuk e di pse këta prokurorë paguhen 3.000 euro e më shumë në muaj”.

“Nuk po dua te besoj se rasti ne Gllogjan nuk eshte marr ende nen kompetence nga Prokuroria Speciale e Republikes se Kosoves. Nese prokuroret e PSRK nuk dalin sonte ne vend te ngjarjes, nuk e marrin lenden ne kompetence, dhe nuk shkojne ne vend te ngjarjes jo nje prokuror po se paku tre e me shume nga PSRK, perfshire vet Kryeprokurori i kesaj prokurorie, atehere nuk di pse kemi PSRK, dhe pse keta prokurore paguhen 3000 Euro e me shume ne muaj”, ka shkruar Miftaraj.

 

Nuk po dua te besoj se rasti ne Gllogjan nuk eshte marr ende nen kompetence nga Prokuroria Speciale e Republikes se...

Posted by Ehat Miftaraj on Friday, November 26, 2021