Mbi 90 mijë fletëvotime të pavlefshme, Cakolli kërkon adresim të çështjes
Eugen Cakolli nga Instituti Demokratik i Kosovës e ka parë si shqetësues numrin prej mbi 90 mijë fletëvotimeve të pavlefshme dhe të zbrazëta në nivel vendi, në zgjedhjet lokale të 17 tetorit.
Sipas tij, problematika kryesore është te fletëvotimet për Kuvende Komunale. Nga mbi 90 mijë fletëvotimet e pavlefshme dhe të zbrazëta, 70 mijë ishin për Asamble.
“Edhe në këto zgjedhje ka vijuar trendi jashtëzakonisht i lartë e negativ i votave të pavlefshme. Në bazë të rezultateve të deritanishme të KQZ-së, kemi gjithsej 90,289 fletëvotime të pavlefshme dhe të zbrazëta në nivel vendi. Prej tyre, PLOT 70 MIJË (mesatarja në nivel vendi 8.56%) janë vetëm për kuvendet komunale - që paraqet edhe pjesën më problematike”, ka shkruar ai në Facebook teksa ka renditur edhe përqindjen më të lartë të votave të pavlefshme e ato me përqindjen më të ulët.
Komunat me përqindjen më të lartë të votave të pavlefshme janë: Ranillugu (18.75%), Graçanica (15.70%), Drenasi (11.48%), Parteshi (11.36%), Mitrovica e Jugut (10.48%) dhe Obiliqi (10.43%). Në anën tjetër, komunat me përqindjen më të vogël janë Leposaviqi (2.72%), Zveçani (2.82%) dhe Mamusha (4.08%), ka njoftuar ai.
Sipas Cakollit, kjo çështje duhet të adresohet menjëherë. Ai ka thënë për këtë duhet të ketë ndryshim të dizajnit të fletëvotimeve, rikonceptim të kampanjave për informim të votuesve lidhur me mënyrën e votimit, por “gjithsesi duke mos anashkaluar edhe rishikimin e sistemit të votimit në zgjedhjet lokale në tërësi”.
