Ndryshimet në KPK, me ligj parashihet që anëtarëve t’u shkëputet mandati në gjysmë
Ministria e Drejtësisë po e planifikon ndryshimin e dy ligjeve bazike, atë për Kryeprokuror të Shtetit e Ligjin për Këshillin Prokurorial. Kësisoj, planifikohet që të rregullohet puna në KPK. Kjo instancë i ka 13 anëtarë, tre prej të cilëve zgjidhen nga Kuvendi. E Qeveria e drejtuar nga VV-ja planifikon që KPK-ja t’i ketë shtatë anëtarë, shumica e të cilëve do të zgjidheshin nga Kuvendi. Nëse këto ndryshime ligjore kalojnë, atëherë anëtarëve të KPK-së mund t’u shkëputet mandati në gjysmë
Premium
Ministria e Drejtësisë po e planifikon ndryshimin e dy ligjeve bazike, atë për Kryeprokuror të Shtetit e Ligjin për Këshillin Prokurorial. Kësisoj, planifikohet që të rregullohet puna në KPK. Kjo instancë i ka 13 anëtarë, tre prej të cilëve zgjidhen nga Kuvendi. E Qeveria e drejtuar nga VV-ja planifikon që KPK-ja t’i ketë shtatë anëtarë, shumica e të cilëve do të zgjidheshin nga Kuvendi. Nëse këto ndryshime ligjore kalojnë, atëherë anëtarëve të KPK-së mund t’u shkëputet mandati në gjysmë
Kryeprokurori i Shtetit do ta humbë fuqinë brenda Këshillit Prokurorial të Kosovës.
Drafti i ligjit për këtë instancë nuk e parasheh atë fare në rolin e anëtarit të KPK-së. Nëse ky draft arrin të bëhet ligj, atëherë secila prokurori veç e veç do ta humbë përfaqësimin e saj në këtë institucion.
Aktualisht Këshilli Prokurorial i ka 13 anëtarë, e Ministria e Drejtësisë planifikon që këtë numër ta zvogëlojë në 7.
Nga ky nen kuptohet që zgjedhja e shumicës se anëtarëve të KPK-së do t’i mbetet në duar politikës nëpërmjet Kuvendit.
Aktualisht, nga 13 anëtarë të KPK-së, 10 vinin nga prokuroritë e tre zgjidheshin nëpërmjet Kuvendit.
Ministrja Albulena Haxhiu në emisionin DESKU të KTV-së u është përgjigjur kritikave për ndryshimet ligjore që po planifikohen.
“Ne konsiderojmë që përbërja e KPK-së duhet të jetë katër prokurorë dhe tre joprokurorë, që zgjidhen nga Kuvendi i Kosovës”, ka thënë ajo.
Ehat Miftaraj nga IKD-ja është i pajtimit që Kryeprokurori i Shtetit të mos jetë më pjesë përbërëse e Këshillit Prokurorial. Por, sipas Miftarajt, Ministria e Drejtësisë është vonuar në iniciativat e ndryshimit të këtij ligji dhe Ligjit për Prokurorinë e Shtetit, gjë që, sipas tij, mund t’i kushtojë në procesin e zgjedhjes së Kryeprokurorit të Shtetit, që duhet të fillojë më së voni në janar.
Anëtarët e KPK-së kanë ende mandat, por nëse ndërron ligji, atyre do t’u merret mandati. Por njëjtë, sipas Miftarajt, nuk mund të ndodhë edhe me kryeprokurorin e ri të shtetit nëse zgjidhet, dhe me kryeprokurorët e prokurorive të tjera.
“Në këtë drejtim, në bazë të kësaj praktike, Ministria e Drejtësisë mund të themi që mundet që t’ua ndalë mandatin përgjysmë anëtarëve aktualë të KPK-së. Sidoqoftë, e njëjta mund të them nuk mund të ndodhë edhe me kryeprokurorët e prokurorive përkatëse, sepse në fund të fundit ata nuk janë apo s’mund ta shkarkojnë vetveten”, ka deklaruar ai.
KPK-ja e Ministria e Drejtësisë kanë shkëputur raportet në mes tyre. Kjo për shkak se zëvendësministri, Blerim Sallahu, nëpërmjet një postimi ka shkruar se vetë prokurorët, siç ka thënë, janë të përfshirë në kriminalitet.
