Gjobat e shqiptuara gjatë pas shtrëngimit të masave nga Qeveria janë parë me shumë shqetësim nga sektori i gastronomisë dha ai hotelerisë, raporton Ekonomia Online.
Kryetari i Odës së Hotelerisë dhe Turizmit Hysen Sogojeva thotë se as qytetarët po as bizneset nuk e meritojnë të gjobiten për shkeljen e masave të marra gjatë pandemisë.
Sipas tij, gjobat duhet patjetër që të falen për të gjithë.
“Ne edhe më parë jemi deklaruar se vendimi që është sot ende në fuqi ka qenë pak i ngutshëm, do të thotë nuk është analizuar mirë prandaj nuk meriton populli dhe biznesi këtë gjobë, sepse shumica e evropianëve sot nuk mbajnë maska në hapësira, dhe ne jemi të vetmit. Tash me u shqiptu këto masa mendoj që janë të ngutshme. Nëse i ka kaluar kompetencat edhe biznesi na kemi thanë që ata nëse i kanë kaluar, atëherë ne jemi në rregull dhe nuk reagojmë. Por ne po reagojmë nëse ju ka shqiptuar gjoba prej 2 mijë eurove pa kurrfarë arsye të plotë”, ka thënë Sogojeva.
Teksa ka folur për masat e reja Sogojeva ka thënë se qytetarët duhet të ofrojnë dëshmi për vaksinim ose test negativ kur të futen në lokale, në mënyrë që edhe pronarët të mos ndihen në siklet.
“Unë bëj apel tek qytetarët që të vetëdijesohen, sepse nuk është mirë që të hinë në një lokal ku nuk janë të vaksinuar, ose nuk e kanë identifikimin që janë negativ. Nuk është mirë që të vendosen në pozita të palakueshme pronarët e kafiterive dhe lokaleve, dhe t’i respektojnë rregullat, por edhe menaxherët t’i kërkojnë ato dëshmi”, ka shtuar ai.
Kastriot Januzaj, i cili udhëheq një kafen në kryeqytet, ka thënë se gjatë tërë shtatorit kanë punuar me humbje të mëdha dhe si pasojë e kapaciteteve të përgjysmuara.
Ai ka thënë se biznesi i tij është gjobitur me shumë prej 500 eurove, por që ka të tjerë që janë që janë dënuar deri në 2 mijë euro.
Januzaj ka kërkuar që t’u falën këto gjoba sepse nuk po arrijnë që t’i përballojnë shpenzimet.
“Gjatë shtatorit, gati tërë muajin kemi punuar me hapësirë të përgjysmuar, ku brenda kemi pasur të ndaluar me punu dhe vetëm me hapësira të jashtme. Punë nuk ka pasë se nata ka qenë e ftoftë dhe tavolina shumë pak të lejuara, do të thotë nuk ka qenë mirë. Ne si kafiteri kemi marrë gjobë prej 500 eurove, ka edhe lokale tjera që kanë marrë gjoba deri në 2 mijë euro. Gjobat do ishte mirë me na falë, sepse problem është më i pagu pasi kemi obligime tjera, por edhe tash me gjobat që na u kanë shtu është tejet problem dhe nuk mundemi me i përballu. Do jetë pak e mundimshme sepse duhet me u ndal tek dera e secilit klient më ja kërku dëshminë e vaksinës, do jetë vështirë”, është shprehur ai.
Ndërsa masat e reja detyrojnë institucionet shtetërore dhe institucionet private të paraqesin certifikatën e vaksinimit para hyrjes ku operojnë, përfshirë: Qendrat tregtare; Call center; Gastronomia në ambientet e brendshme, dhe të gjithë punonjësit në institucionet publike dhe private që kanë punë me palë.
Shkollat dhe çerdhet do të hapen nga dita e hënë, 27 shtator, maksimumi i nxënësve do të jetë 20./EO
