Arbëri

Dy incidente në veri ndezin tensionet Kosovë-Serbi

Foto: KOHA
 

Ditën e gjashtë të protestës në Jarinjë, Serbia e ka vëzhguar me aeroplanë luftarakë. Të shtunën, dy të tillë kanë qarkulluar tri herë brenda territorit serb. Por, situatë e njëjtë nuk ka qenë edhe në dy komunat me shumicë serbe, në mesnatën e së premtes. Qendrat e Regjistrimit të Automjeteve në Zubin Potok e Zveçan janë sulmuar nga persona të panjohur deri më tash. Derisa ajo në Zubin Potok është bërë shkrumb, granatat e hedhura në objektin e qendrës në Zveçan nuk kanë eksploduar. Situata në veri të Kosovës ka nxitur reagimin e krerëve të institucioneve e të partive politike në vend

Dy incidentet në komunat veriore në mesnatë, e kanë rritur tensionin mes Kosovës dhe Serbisë të shtunën. Qendrës së Regjistrimit të Automjeteve në Zubin Potok i është vënë zjarri, derisa një gjë e tillë është tentuar të bëhet edhe në Zveçan. Por, dy granata dore të hedhura në drejtim të objektit ku regjistrohen veturat nuk kanë eksploduar.

Gjurmët e flakëve të një nate më parë ishin ende të freskëta në objektin e Komunës së Zubin Potokut, në të cilën gjendet edhe Qendra e Ministrisë së Punëve të Brendshme. Muri i tij ishte i nxirë, dritaret e dëmtuara e disa karrige po ashtu. Ambientet e qendrës janë bërë shkrumb nga zjarri. Përveç kësaj qendre, sipas Policisë së Kosovës, zjarri ka prekur edhe Bibliotekën e Shtëpisë së Kulturës.