Arbëri

Partitë s’i respektojnë masat, AUV-i thotë se nuk ka hasur në shkelje

Partitë Politike nuk u janë përmbajtur zotimeve për mosmbajtjen e tubimeve elektorale për zgjedhjet lokale të 17 tetorit. Ato kanë shkelur edhe masat e vendosura nga Qeveria. Ndërkohë, Agjencia e Ushqimit dhe Veterinës thotë se nuk ka hasur në shkelje, e nga Policia nuk kanë treguar nëse kanë gjobitur ndonjë parti për shkelje të masave

Tubime me më shumë se 50 persona në ambiente të jashtme, simpatizantë pa maska dhe tubime në ambiente të mbyllura janë hasur në këto pesë ditë të fushatës për zgjedhjet lokale të organizuara nga partitë politike.

Por, këto shkelje sipas zëdhënësit të Agjencisë së Ushqimit dhe Veterinës, Lamir Thaçi, nuk janë hasur nga ana e inspektorëve sanitarë që veprojnë në kuadër të Agjencisë së Ushqimit dhe Veterinës.

“Deri tani, nga ana e inspektorëve tanë nuk është hasur ndonjë organizim politik, por kurdo që kjo të ndodhë, atëherë inspektori është i obliguar që për secilin veprim që e has, të shqiptojë masa ndëshkimore brenda mandatit ligjor që ka”, ka thënë ai.

Por, inspektorët e këtij institucioni që nga 10 shtatori deri më 16, kanë shqiptuar 70 gjoba për persona fizikë dhe 81 të tjera për persona juridikë për shkelje të masave anticovid.

Videot e shfaqura nga partitë politike dhe mediat, ku shihen shkeljet, sipas AUV-it, nuk hetohen nga ana e tyre.

“Në bazë të ligjeve në fuqi, inspektori shqipton masa ndëshkimore në bazë të të gjeturave faktike. Do të thotë ai e shkruan procesverbalin në bazë të gjetjeve kur ai është aty. Për të iniciuar hetim mbi një raportim atëherë merren organet e tjera kompetente”, ka theksuar Thaçi.

Në secilin veprim që bie ndesh me masat e vendosura me vendim të Qeverisë, thotë se kanë shqiptuar gjoba varësisht nga shkelja që është bërë bazuar në ligjin për Covid-19.

“Ne bashkë me Policinë gjatë gjithë kohës jemi në terren dhe kurdo që hasim në shkelje pa marrë parasysh se kush i bën ato shkelje, secili veprim që bie ndesh me masat do të gjobitet ose nga ne ose nga Policia e Kosovës, varësisht nga kush haset në terren”, ka theksuar Thaçi.

KOHA ka kërkuar një përgjigje edhe nga ana e Policisë së Kosovës lidhur me masat që janë shqiptuar për mosrespektim të vendimeve të Qeverisë, por ata nuk janë përgjigjur gjatë së hënës.

Një ditë më parë, ky institucion ka bërë të ditur se ka shqiptuar mbi 1,600 gjoba për shkelje të këtyre masave brenda 24 orëve.

Partitë, edhe pse ishin zotuar se nuk do të mbanin tubime në mënyrë që të ruajnë shëndetin e qytetarëve, ky zotim nuk është përmbushur.

Një ditë më parë, në tubimin e mbajtur nga Nisma Socialdemokrate në Malishevë është parë prania e një numri të simpatizantëve pa maska.

Edhe tubimi i kandidatit të PDK-së për Prizren, Shaqir Totaj ka pasur shkelje të masave, pasi që numri i personave të pranishëm ishte 82, ndërsa Ligji AntiCovid nuk lejon tubimet me më shumë se 50 persona.

Edhe kandidati për kryetar të Gjakovës, Teki Shala një ditë gjatë takimit me disa qytetarë kishte shkelur masat anticovid. Takimi ishte zhvilluar brenda një restoranti ku 12 persona kanë qëndruar në një tavolinë, pa distancë fizike e në kundërshtim me masat antiCOVID.