2 perditesime
18:17

Lajçak thotë se me Kurtin nuk ka biseduar për hapjen e arkivave të Kosovës

Përfaqësuesi special i Bashkimit Evropian për dialogun Kosovë-Serbi, Mirosllav Lajçak ka thënë se është duke punuar për të caktuar një takim të radhës ndërmjet kryeministrit të Kosovës, Albin Kurti dhe presidentit serb, Aleksandar Vuçiq.

Pas takimit me kreun qeveritar, Lajçak tha se nuk ka biseduar për hapjen e arkivave të Kosovës.

“Kemi biseduar për dialogun po ashtu edhe për bashkëpunimin rajonal, nuk kemi diskutuar për hapjen e arkivave. Për kohën e fillimit të dialogut do të përgjigjem më vonë, do të takohem me shumë akterë. Nuk dua bëjë deklarata politike. Do të përgjigjem për të gjitha në fund të vizitës. Po punojmë për datën e fillimit të dialogut”, tha Lajçak.

Lajçak është takur edhe me zëvendëskryeministrin Besnik Bislimi. Nesër takohet me kryeparlamentarin Glauk Konjufca, e po ashtu me shefat e grupeve parlamentare e me përfaqësues të OJQ-ve. 

Diplomati sllovak ndodhet për vizitë treditore në Kosovë gjatë së cilës ai do të takohet edhe me zyrtarë të tjerë të lartë të vendit.

17:08

Lajçak arrin në objektin e Qeverisë për takimin me Kurtin

Emisari i BE-së prë dialogun Kosovë – Serbi, Mirosllav Lajçak, ka hyrë në objektin e Qeverisë në Prishtinë, për t’u takuar me kryeministrin e Kosovës, Albin Kurti.

Takimi po zhvillohet i mbyllur për medie, të njëjtat janë lejuar të marrin pamje vetëm në fillim të takimit.

Lajçak ka arritur sot në Kosovë, ku do të ketë takime me krerët e shtetit.

Të enjten në mëngjes është paraparë takim me kryetarin e Kuvendit, Glauk Konjufca.

 

Image
16:30

Lajçak në Prishtinë, pritet të takohet me Kurtin

Emisari i BE-së për dialogun Kosovë – Serbi, Mirosllav Lajçak, ka arritur në Prishtinë.

Ai është duke shkuar në Zyrën e BE-së në Prishtinë, ndërsa pritet të ketë sonte takim me kryeministrin e Kosovës, Albin Kurti.

Lajçak të enjten do të takohet me kryetarin e Kuvendit, Glauk Konjufca. Siç është njoftuar nga Kuvendi, takimi do të mbahet në ora 8:45 të mëngjesit.